Sioleta, 5 lutaha, u Słonimie, padčas adkryćcia hoda kultury, staršynia Słonimskaha rajvykankama Aleh Tarhonski paabiacaŭ, što ŭ 2016 hodzie namahańniami ŭsich słonimcaŭ i kiraŭnictva rajona pavinien być adkryty pomnik byłomu słonimskamu staroście, kancleru Vialikaha Kniastva Litoŭskaha Lvu Sapiehu (1557-1633).
Ale pomnika Sapiehu ŭ Słonimie nie budzie. Pra heta paviedamili ŭ Słonimskim rajvykankamie. Nie budzie pomnik ustanoŭleny ni sioleta, ni ŭ 2017 hodzie, bo niama hrošaj.
Nahadajem, što pomnik Lvu Sapiehu ŭ Słonimie miarkujuć užo pastavić bolš za 15 hadoŭ. I prajekt pomnika jość, ale niama hrošaj na sam pomnik, jaki pahadziŭsia zrabić Narodny mastak Biełarusi Ivan Misko, jaki rodam sa Słonimščyny. Nie budzie pomnika Lvu Sapiehu ŭ Słonimie i ŭ bližejšyja hady.
A pry Lvu Sapiehu Słonim staŭ kulturnym, pramysłovym i palityčnym miescam. Pobač z zamkam na bierazie Ščary kancler Sapieha ŭźvioŭ muravany pałac, dzie sa studzienia 1597 hoda prachodzili hienieralnyja siejmiki Vialikaha kniastva Litoŭskaha. U słonimskim zamku znachodziłasia i dobraja biblijateka, archiŭ, tvory mastactva. Leŭ Sapieha dobraŭparadkavaŭ u Słonimie vulicy, masty, darohi, pabudavaŭ šmat aŭsteryj. Jon adkryŭ novyja kirmašy, pramysłovyja manufaktury, budavaŭ administratyŭnyja i haspadarčyja budynki.
