U Biełarusi ŭpieršyniu praviedziena apieracyja pa transpłantacyi kompleksu serca-lohkija, paviedamiŭ žurnalistam 15 listapada dyrektar RNPC «Kardyjałohija», hałoŭny pazaštatny kardyjołah Ministerstva achovy zdaroŭja Biełarusi Alaksandr Mročak.
Pavodle jaho słoŭ, unikalnaja dzieviacihadzinnaja apieracyja vykananaja 2 listapada ŭ RNPC «Kardyjałohija» ŭ Minsku bryhadaj prykładna z dvaccaci lekaraŭ pad kiraŭnictvam akademika Juryja Astroŭskaha.
Jak nahadaŭ Mročak, paśla praviadzieńnia ŭ Biełarusi pieršaj pierasadki serca ŭ 2009 hodzie ŭračy zajavili pra mahčymaść transpłantacyi kompleksu orhanaŭ praz hod-dva, adnak ažyćciavić heta ŭdałosia tolki ciapier.
«Praces padrychtoŭki, u pieršuju čarhu śpiecyjalistaŭ, byŭ doŭhim i składanym, tym nie mienš usie bar`iery atrymałasia pieraadoleć», — skazaŭ Mročak.
Kardyjachirurh RNPC Siarhiej Śpirydonaŭ raskazaŭ, što ŭ respublicy ŭžo siem hadoŭ pravodzicca transpłantacyja serca ŭ pacyjentaŭ z sardečnaj niedastatkovaściu. Adnak jość hrupa pacyjentaŭ, jak praviła, z praciahłym parokam serca, jaki pryvodzić da vysokaj lohačnaj hipiertenzii. Im transpłantacyja tolki serca nie dapamoža, tamu što budzie raźvivacca pravažałudačkavaja niedastatkovaść.
«My doŭha treniravalisia, stvaryli hrupu recypijentaŭ, prajšli stažyroŭku va Univiersiteckaj klinicy Hanoviera (Hiermanija), jakaja ź`iaŭlajecca suśvietnym lidaram pa transpłantacyi lohkich i kompleksu serca-lohkija, — raskazaŭ jon. — Štohod tam vykonvajecca kala 150 transpłantacyj lohkich i kala 10-15 transpłantacyj kompleksu serca-lohkija».
Recypijent — mužčyna 32 hadoŭ, jaki maje pryrodžany paroka serca, što pryvioŭ da vysokaj lohačnaj hipiertenzii. U list čakańnia byŭ uniesieny sioleta ŭ sakaviku.
«Pra paśpiachovaść apieracyi chirurhi zvyčajna kažuć, kali pacyjent sychodzić dadomu, — skazaŭ Śpirydonaŭ. — U hetym vypadku mahu skazać, što kryzisny pieryjad — heta pieršyja dni, pieršyja tydni».
Jon adznačyŭ, što da apieracyi ŭ pacyjenta nazirałasia sardečnaja i lohačnaja niedastatkovaść. Ciapier hetyja ź`iavy kupirujucca, pacyjent pastupova idzie na papraŭku. Mužčyna znachodzicca ŭ reanimacyjnym błoku, samastojna pa im pierasoŭvajecca, adčuvaje siabie, pavodle słoŭ lekaraŭ, «dastatkova niadrenna». Napieradzie ŭ jaho praciahłaja reabilitacyja.
Pavodle jeŭrapiejskaha dośviedu piacihadovaja vyžyvalnaść pacyjentaŭ paśla transpłantacyi lohkich składaje kala 70%, paviedamiŭ kardyjachirurh. Pakazańni da transpłantacyi kompleksu serca-lohkija — kali biez apieracyi pacyjent nie pražyvie bolš za hod. U Rasii pieršaja takaja apieracyja była praviedzienaja ŭ 2014 hodzie, druhaja — u minułym.
Pavodle słoŭ kardyjachirurha, u Biełarusi siońnia ŭ śpisie čakańnia na transpłantacyju kompleksu serca-lohkija abo lohkich z karekcyjaj paroku kłapanaŭ serca znachodzicca 15 čałaviek. Dla praviadzieńnia apieracyi nieabchodna, kab recypijent i donar supadali pa mnohich paramietrach, u tym liku pa roście i vazie. Jak adznačyŭ kardyjachirurh, na žal, niekalki recypijentaŭ apieracyi ŭžo nie dačakalisia.
U Biełarusi pravodzicca jašče adna apieracyja pa transpłantacyi orhana razam z sercam — kompleksu serca-nyrki. Na siońnia vykanany try takija apieracyi.
