Hoł Fernanda Toresa |
Matč hladzieŭsia viesieła i žvavieńka, u adroźnieńnie ad minułaha finału: Partuhalija – Hrecyja.
Ad siaredziny pieršaha tajmu padapiečnyja Łui Arahanesa zavałodali inicyjatyvaj i amal nie vypuskali jaje da kanca matču.
Prykładna na 25-j Fernanda Tores (Liverpul) mieŭ 150-pracentny momant. Za niemcaŭ zastupilisia spačatku štanha, potym ich varatar – Leman.
Na 33-j chvilinie Tores svoj miač zabiŭ, paśla pryhožaha prachodu, abahnaŭšy samoha Filipa Łama.
U druhim tajmie hišpancy nia tolki nia syšli ŭ hłuchuju abaronu, ale naadvarot pavialičyli častatu atak i mieli kolki vydatnych momantaŭ, ale nie šancavała, ci vyručaŭ veteran Leman.
A ŭsie ataki niemcaŭ abo rassypalisia ab abaronu padapiečnych Arahanesa ci ab ruki Kasiljasa.
Praz 44 hady Hišpanija znoŭ čempijon Eŭropy. I hetym razam abyšlisia biez Raula, jakoha Arahanes pierad čempijanatam nie ŭklučyŭ u zajaŭku.
Hišpancy nia prajhrali na čempijanacie nivodnaha matču, atrymaŭšy šeść pieramoh i zabiŭšy 12 miačoŭ (Rasieja -- 4:1, Švecyja -- 2:1, Hrecyja -- 2:1, Italija -- 0:0, 4:2- penalci, Rasieja -- 3:0, Niamieččyna -- 1:0).
Kapitan čyrvonaj furyi Ikier Kasiljas, vidavočna, — najlepšy hałkipier čempijanatu: u asnoŭny čas u płej-of jon nie prapuskaŭ, a ŭ seryi penalci ź Italijaj paryravaŭ dva miačy.
Najlepšy snajper — taksama hišpaniec. Heta David Vilja (4 miačy), jaki ŭ finale, praŭda, praz traŭmu nie hulaŭ.
Karaciej, čystaja pieramoha.