«My nie fiksujem na dadzieny momant istotnych patokaŭ vyvazu zbroi z Ukrainy. Adzinkavyja vypadki zdarajucca, ale kazać pra toje, što isnujuć niejkija stabilnyja trafiki abo cełyja kanały, padstavaŭ niama. Słovy prezidenta susiedniaj dziaržavy ja nie mahu kamientavać, ale situacyja nie maje takoha maštabnaha charaktaru, jak havorycca ŭ zajavie», — padkreśliŭ Słabadzian.
Jon paćvierdziŭ svaje słovy aficyjnymi dadzienymi Dziaržaŭnaj pamiežnaj słužby, pavodle jakich za 9 miesiacaŭ na biełaruskaj miažy pamiežniki zatrymali 49 adzinak zbroi. Siarod jaje 28 adzinak — ź Biełarusi na ŭjezd va Ukrainu i 21 — na vyjezd z Ukrainy.
Heta značyć, rastłumačyŭ Słabadzian, ź Biełarusi ŭvoziłasia bolš zbroi, čym vyvoziłasia z Ukrainy. Taksama było kanfiskavana 242 bojeprypasy i 0,5 kh vybuchoŭki, jakuju ŭvozili va Ukrainu ź Biełarusi.
Słabadzian padkreśliŭ, što, pa ŭsich pakazčykach, zbroi vyvozili z Ukrainy mienš, čym za anałahičny pieryjad minułaha hoda.
Pavodle infarmacyi biełaruskaha boku, jakuju jana pradastaŭlaje ŭkrainskaj ŭ ramkach abmienu, bolš zbroi jany zatrymali na miažy ź Litvoj — heta bolš za 5 tysiač adzinak zbroi, padsumavaŭ Słabadzian.
Siońnia Alaksandr Łukašenka zajaviŭ padčas razmovy z pradstaŭnikami srodkaŭ masavaj infarmacyi i błohierami z Rasii, što z Ukrainy ŭ Biełaruś idzie vialiki patok zbroi. «My hrudźmi zakryvajem 1200 kiłamietraŭ miažy z Ukrainaj, tamu što patokam idzie zbroja, vybuchoŭka. My ich užo zatrymlivajem nie tolki na miažy, ale i na čyhunačnym vakzale. Nam vielmi niaprosta», — zajaviŭ Łukašenka i dadaŭ, što patrebnyja vialikija namahańni i zatraty, kab padtrymlivać biaśpieku na ŭkrainskaj miažy.
