Načalnik adździeła adukacyi, sportu i turyzmu Maładziečanskaha rajvykankama Ina Drapieza i dyrektar SŠ №11 Alaksandr Lulkovič atrymali vymovy. Dva namieśniki dyrektara škoły pieraviedzienyja ŭ nastaŭniki.
Usie hetyja dyscyplinarnyja spahnańni vyniesienyja ŭ suviazi z hibiellu na bulbianym poli 13-hadovaj vučanicy SŠ №11 Viktoryi Papčeni, jakaja trapiła pad koły MAZa 29 vieraśnia.
Dyrektar SŠ №11 Alaksandr Lulkovič 22 listapada raspavioŭ Kraj.baj:
— Tak, ja i Ina Fieliksaŭna Drapieza atrymali vymovy. Heta źviazana z hibiellu dziaŭčynki. Nijakaha sakretu ŭ hetym niama. Namieśnik dyrektara našaj škoły pa vučebnaj rabocie Halina Piščyk pieraviedzienaja ŭ nastaŭnika francuzskaj movy. Namieśnik dyrektara pa vychavaŭčaj pracy Dzianis Kurec ciapier pracuje nastaŭnikam historyi i sacyjalnym piedahoham. Hetyja pieravody taksama z-za hibieli Viktoryi Papčeni. Abodva panižanyja na pasadzie ŭ suviazi z adnarazovym hrubym parušeńniem pracoŭnych abaviazkaŭ.
Pa słovach dyrektara, miescy jaho namieśnikaŭ pakul zastajucca vakantnymi. Novyja pryznačeńni buduć praviedzienyja paśla ŭzhadnieńnia z adździełam adukacyi, sportu i turyzmu rajvykankama.
— Hibiel Viktoryi Papčeni — trahiedyja dla nas usich. Nie tolki dla baćkoŭ dziaŭčynki, ale i dla piedahohaŭ. Psichałahična traŭmavanyja nastaŭniki, jakija byli ź joj na tym poli. Boh čamuści adviarnuŭsia ad nas, — skazaŭ Alaksandr Lulkovič.
Pravavy inśpiektar prafsajuza rabotnikaŭ radyjoelektronnaj pramysłovaści (REP) Leanid Sudalenka, jaki pradstaŭlaje intaresy baćki zahinułaj dziaŭčynki Aleha Papčeni, nie zadavoleny hetymi dyscyplinarnymi spahnańniami:
— Ja pierakanany, što načalnik adździeła adukacyi i kiraŭnictva škoły pavinny nie tolki panieści dyscyplinarnyja pakarańni, ale ich taksama nieabchodna pryciahnuć da kryminalnaj adkaznaści. Kali hetaha nie zdarycca, nichto nie daść harantyju, što praź niejki čas takaja ž trahiedyja nie paŭtorycca ŭ jakim-niebudź inšym rehijonie Biełarusi.
Nahadajem, što 28 listapada sud Maładziečanskaha rajona razhledzić skarhu Aleha Papčeni na inśpiekcyju pracy.
Kryminalnaja rasśledavańnie pa hibieli Viktoryi Papčeni praciahvajecca.
