U 2015 i 2016 hh. pieravozki skłali 125 i 50 vahonaŭ adpaviedna.
U 2017 hodzie ŭ Biełarusi buduć pravodzicca maštabnyja sumiesnyja z Maskvoj vučeńni «Zachad-2017».
«U idei i scenary vučeńniaŭ budzie ŭličanaja situacyja, źviazanaja z uzmacnieńniem aktyŭnaści NATA kala miežaŭ Sajuznaj dziaržavy», — adznačaŭ ministr abarony RF Siarhiej Šajhu na pačatku listapada.
Adnak zapłanavany rezki rost rasijskich vajskovych pastavak u Biełaruś vyklikaŭ zrazumiełuju zaniepakojenaść va ŭkrainskaj presie.
Tam vykazvajuć mierkavańnie, što heta moža aznačać razhortvańnie ŭ Biełarusi bujnoj rasijskaj hrupoŭki dla ahresiŭnych dziejańniaŭ suprać Ukrainy ci navat krain Bałtyi.
Fota: «Interfaks-Ukraina»
Taksama prybyćcio vialikaj kolkaści rasijskich vojsk moža być vykarystana dla ŭstalavańnia poŭnaha kantrolu nad terytoryjaj samoj Biełarusi, ličyć dyrektar Centra stratehičnych i zamiežnapalityčnych daśledavańniaŭ Arsien Sivicki.
Pa słovach biełaruskaha ekśpierta, płany Maskvy śviedčać nie prosta pra ŭdzieł u maštabnych vučeńniach, a pra nakiravańnie ŭ Biełaruś vialikaj častki rasijskaj 1-j Hvardziejskaj tankavaj armii.
«Možna kazać pra ŭskosnyja śviedčańni taho, što Kreml u 2017 hodzie źbirajecca ažyćciavić dziejańni pa stratehičnym razhortvańni svajoj vajskovaj hrupoŭki na biełaruskaj terytoryi, što dla Biełarusi budzie aznačać vajskovaje ŭmiašalnictva Rasii z metaj ustalavańnia poŭnaha vajennaha i palityčnaha kantrolu», — skazaŭ Sivicki ŭ kamientary ŭkrainskamu vydańniu.
Analityk Biełaruskaha instytuta stratehičnych daśledavańniaŭ (BISS) Dzianis Mieljancoŭ prytrymlivajecca inšaha mierkavańnia.
«Dumaju, što taki mierkavany rost hruzapieravozak źviazany z zapłanavanymi na nastupny hod maštabnymi vučeńniami «Zachad-2017» na terytoryi našaj krainy. U 2013 hodzie, kali taksama pravodzilisia padobnyja vučeńni, byli zadziejničanyja ŭ asnoŭnym rasijskija palihony, hetym moža patłumačyć nievysoki hruzapatok u 2013 hodzie», — kaža ekśpiert.
Ahladalnik haziety «Biełaruski rynak» Alaksandr Alesin, adznačaje, što ciapier Rasija nie maje sił i srodkaŭ dla akupacyi novych vialikich terytoryj.
«Zašmat, kaniečnie. Pytańnie — jakaja technika budzie pierakidvacca. Imavierna, buduć pierakidvać paŭnavartasnyja złučeńni, niekalki bryhad ci navat dyvizij z technikaj. U adnoj tankavaj dyvizii kala 250 tankaŭ, artyleryja, inšaja braniatechnika, bienzavozy, hruzavyja mašyny. Možna mierkavać, što vučeńni buduć bujnymi», — kaža Alesin.
Ekśpiert ličyć, što buduć adpracoŭvać pierakid i dziejańni vojskaŭ, jakija pa supolnych płanach pavinny prybyć u Biełaruś u vypadku pahrozy vajny na zachodnim napramku.
Alaksandr Alesin ličyć, što hrupoŭka, jakaja b jana ni była, nie zmoža ŭtrymać Biełaruś, a tym bolej atakavać Ukrainu i kantralavać tam akupavanyja terytoryi.
«Prosta tak, bieź miždziaržaŭnaha pahadnieńnia, zastacca jany nie zmohuć, a dla akupacyi Biełarusi takoj kolkaści «zialonych čałaviečkaŭ» jaŭna niedastatkova», — kaža jon.
«Łukašenka ž i navat sam Pucin ciapier nie zacikaŭlenyja va ŭvachodzie na novyja terytoryi Ukrainy. Pucinu b zaraz by status-kvo utrymać na fonie Siryi, mahčymych prablem u Centralnaj Azii. Utrymać novuju zachoplenuju terytoryju budzie niemahčyma», — ličyć ekśpiert.
Dzianis Mieljancoŭ taksama ličyć vielmi małaimaviernym ciapier «krymski varyjant» dla Biełarusi.
«Dla Rasii niama patreby dałučać Biełaruś, bo zbolšaha jaje intaresy tut i tak zabiaśpiečanyja», — adznačaje jon.