Palicyja ZŠA šukaje mužčynu, jakomu ŭdałosia ściahnuć z braniavanaj inkasatarskaj mašyny ŭ Ńju-Jorku kantejnier z zołatam vahoj u 36 kiłahramaŭ, piša VVS.
NBC
Kradziež adbyŭsia 29 vieraśnia ŭ adnym z samych zahružanych rajonaŭ Manchetena Midtaŭn, ale viadoma pra jaho stała tolki ciapier. Vykradzienaje zołata aceńvajecca prykładna ŭ 1,6 młn. dalaraŭ.
Na kadrach z kamier vonkavaha nazirańnia vidać, što mašyna na niekatory čas była pakinutaja biez nahladu, i złačyncu spatrebiłasia ŭsiaho 20 siekund, kab prakrucić spravu. Adnak noša akazałasia zanadta ciažkaj, i na kadrach CCTV vidać, što złamyśnik cełuju hadzinu pieraadolvaŭ adlehłaść, jakuju možna prajści za 10 chvilin.
Złodziej išoŭ pa šmatludnaj vulicy, raz-poraz spyniajučysia, kab pieravieści dychańnie. Potym jon vyjšaŭ z zony achopu kamier. Ułady miarkujuć, što jon pakinuŭ Ńju-Jork i ciapier chavajecca niedzie ŭ Arłanda abo ŭ Majami, štat Fłaryda.
Palicyja schilajecca da viersii, što mužčyna prosta prahulvaŭsia niepadalok, kali ŭbačyŭ, što adkrytaja mašyna pakinutaja biez nahladu. Adzin z achoŭnikaŭ panios pa adrasie dastaŭku, a druhi na chvilinu adyšoŭ da kabiny za mabilnym telefonam, pakinuŭšy adkrytym kuzaŭ.
«Ja dumaju, jon prosta skarystaŭsia mahčymaściu, uziaŭ kantejnier i tolki jaho i bačyli», — kaža detektyŭ ńju-jorkskaj palicyi Marcin Pastar. Na jaho dumku, złačyniec nie viedaŭ, što mienavita znachodzicca ŭ kantejniery.
Zołata koštam u miljony dalaraŭ znachodziłasia ŭ niemarkavanym čornym mietaličnym viadry.
Pa apisańni palicyi, złamyśniku prykładna 50-60 hadoŭ, jon łacinaamierykanskaha pachodžańnia, rostam kala 170 sm i vahoj prykładna ŭ 70 kh.
