«Hetaj nočču ŭ pasiołku Kniažyčy Bravarskoha rajona adbyłasia žudasnaja trahiedyja, u vyniku jakoj zahinuli 5 supracoŭnikaŭ palicyi, — paviedamlaje ŭ svaim fejsbuku daradca ministra ŭnutranych spraŭ Ukrainy Anton Hieraščanka. —
Abstaviny trahiedyi takija.
Miesca trahiedyi. Tut i nižej fota z fejsbuka Hieraščanki
Kryminalny vyšuk horada Kijeva pracavaŭ nad zatrymańniem niebiaśpiečnaj bandy rabaŭnikoŭ, jakaja sistemna rabavała damy kijaŭlan i žycharoŭ Kijeŭskaj vobłaści.
U hetuju noč supracoŭniki kryminalnaha vyšuku atrymali apieratyŭnuju infarmacyju pra toje, što čarhovaje rabavańnie moža adbycca ŭ pasiołku Kniažyčy. Tudy vyjechała hrupa zatrymańnia kryminalnaha vyšuku i śpiecpadraździaleńnie KORD.
Na adnoj z vulic pasiołka Kniažyčy, u budavanym pryvatnym domie, byli raźmieščanyja palicyjanty-raźviedčyki, zadača jakich była sačyć za stanoviščam i padać kamandu na zatrymańnie bandytaŭ.
Niedabudavany dom, u jakim byli raźmieščanyja supracoŭniki palicejskaj vyviedki.
Płanavałasia kłasičnaje zatrymańnie bandy rabaŭnikoŭ u toj momant, kali jany pasprabujuć prystupić da ažyćciaŭleńnia złačynnaj zadumy. Adnak trahičny łancuh vypadkovaściaŭ pieraškodziŭ hetamu.
U hety čas u susiednim domie u aŭtamatyčnym režymie spracavała achoŭnaja sihnalizacyja. Na miesca prybyŭ narad dziaržsłužby achovy, jaki zaŭvažyŭ i zatrymaŭ dvaich palicejskich-raźviedčykaŭ.
Dom, u jakim vypadkova spracavała achoŭnaja sihnalizacyja, i z-za jakoj na miesca vyjechali supracoŭniki dziaržsłužby achovy.
U toj ža čas hrupa zachopu, miarkujučy pa ŭsim, vyrašyła, što supracoŭniki vyviedki patrapili ŭ biadu, zachoplenyja złačyncami, jakija ich vyjavili, i vyjechali na mikraaŭtobusie na vulicu, dzie supracoŭniki DSA zatrymali palicejskich-raźviedčykaŭ.
Dalej pamiž supracoŭnikami DSA i hrupaj zachopu adbyłasia pierastrełka, jakaja doŭžyłasia niekalki imhnieńniaŭ i zabrała piać žyćciaŭ. Zahinuli dvoje supracoŭnikaŭ dziaržsłužby achovy, dvoje palicejskich-raźviedčykaŭ i supracoŭnik śpiecpadraździaleńnia KORD, jaki ŭvachodziŭ u hrupu zachopu.
Rabić zaŭčasnyja vysnovy i ładzić śpiekulacyi na hibieli palicejskich — nielha!
Śledčyja prakuratury ŭžo pracujuć na miescy trahiedyi i buduć pasiekundna adnaŭlać usie detali taho, što adbyłosia, i vyśviatlać pryčyny taho, jak i čamu ŭsio heta stała mahčymym.
Unutranaje rasśledavańnie Nacyjanalnaj palicyi taksama budzie poŭnym, usiebakovym i sumlennym. Hramadstva budzie viedać usiu praŭdu ab hetaj trahiedyi.
Troje padazravanych u razbojach, jakich rychtavalisia złavić «na haračym», pačuŭšy pierastrełku, admovilisia ad svajho płana pa rabavańni i vyjechali na dvuch Toyota Land Cruiser 200 u bok Kijeva, dzie byli zatrymanyja apieratyŭnikami.
U ich kanfiskavanaja ahniastrelnaja zbroja. Jany zatrymanyja, i im buduć vystaŭlenyja abvinavačvańni va ŭčynienych rabavańniach i razbojach».
