Apošnim časam stała prykolna jeździć u tralejbusach. Ciapier na prypynkach pasažyry ŭvažliva skanujuć padychodziačuju mašynu na pradmiet biaśpieki. Byccam «tralejbus-zabojca» pavinien ciahnuć za saboju žmut aholenych pravadoŭ i zichacieć, jak dyskateka. U salonie ludzi ruchajucca bolš aściarožna, namahajučysia trymacca vyklučna za izalavanyja parenčy, čym nahadvajuć kulbity Džona Sylvera na pałubie karveta, što trapiŭ u štorm. Vyrazy tvaru niekatorych śviedčać, što jany znachodziacca ŭ ekzystencyjalnym transie: «Zabje — nie zabje, a kali zabje — čamu? Moža, tamu, što niapravilna žyŭ?»
Staŭlu zub, što adzin z tych, chto mižvoli staŭ śviedkam nadzvyčajnaha zdareńnia, pierad tym jak sieści ŭ tralejbus, vypadkova zrabiŭ niejkuju ekstravahantnuju reč — naprykład, vykinuŭ «Saŭbiełku» ŭ śmietnicu sa słovami «Kitaj, Kitaj!.. Chiba toj Chu… (Vyrazana cenzuraj. — Red.) Czińtao mnie žyroŭku apłacić?!» Ciapier jon ličyć, što heta vyratavała jamu žyćcio, i, idučy na transpart, abaviazkova skłaniaje imia staršyni KNR. A dniami ja bačyŭ karhu, jakaja pierad tym, jak stać klijentam «Miensktransu», achinuła perpetum mobile kryžam. Na našych vačach farmujecca niejkaja novaja kultura staŭleńnia ludziej da mašyn.
My nazirajem pieršyja probliski jerasi, jakaja vidavočna stanie daminoŭnaj iracyjanalnaj daktrynaj XXI st. Tatalnaja zaležnaść čałavieka ad techniki pravakuje etyku pakłanieńnia pierad vyšejšym mašynnym rozumam. Chiba nie ad jaho zaležyć, ci ty budzieš narmalna žyć i zarablać, ci tvoj komp laśniecca, i tabie daviadziecca tydzień biehać pa kamputarščykach u pošukach niejkaj WinFast PX6600 TD 256MB DDR2.
Dziŭnym čynam biełarusy apynulisia ŭ avanhardzie trendaŭ čałaviečaj dumki. Heta stavić pierad nami cikavaje pytańnie: što rabić dalej? Mahčymyja adkazy:
a) puścić spravu na samaciok. Kali najbližejšym časam na tralejbusnych linijach ničoha nia zdarycca, zababony raźviejucca, i my znoŭ budziem biesturbotna na chalavu jeździć 29-m na Kamaroŭku, vyrazajučy na śpinkach tralebujsnaha kresła «Šachcior — čempijon» abo «Łuku na muku»;
b) vykarystać momant, pnuć Fiłareta i ŭvieści kult hałoŭnaj mašyny (kamputara) pa versii monateistyčnych relihij, a tralejbusaŭ, jakija močać tokam, traktavać jak kamisaraŭ vyšejšaj siły nakštałt archaniołaŭ.
Naturalna, apošniaje słova naležyć Jamu. Kali zaŭtra «Saŭbiełka» paŭmiljonnym nakładam nie abvieścić, što 24 śniežnia — dzień naradžeńnia syna paŭpravadnika, fih što vyjdzie.
Ja, naturalna, maleńki muraš, jakoha kožnuju chvilinu možna pa 153 artykule KK adpravić na nary, adnak aśmielusia prasić Vašu Vialikaść jašče raz usio ŭzvažyć.
Što lepiej — zastavacca niejkim słavianskim Truvoram ci stać apostałam novaj suśvietnaj relihii, jakaja pozna ci rana zapanuje na planecie? Albo čałaviectva praz 20 hadoŭ budzie pačynać pierazahruzku ź «Bił Hiejts iže jasi na niebiasi», albo…
P.S. Kali vy zrobicie vybar na karyść druhoha varyjantu, možna, ja budu «Lolikam Pradciečam»?
