Staršynia ruchu «Za Svabodu», były kandydat u deputaty Juraś Hubarevič paskardziŭsia na adsutnaść rasśledavańnia spravy pa faktach falsifikacyjaŭ na vybarach u Pałatu pradstaŭnikoŭ, paviedamlaje pres-słužba.
Były kandydat u deputaty pa 108 Kalinoŭskaj vybarčaj akruzie Hubarevič u vieraśni nakiravaŭ skarhu ŭ Śledčy kamitet pa vynikach vybaraŭ z patrabavańniem pravieści pravierku i ŭzbudzić kryminalnuju spravu pa falsifikacyjach. SK nie zmoh pryniać rašeńnie pa hetaj zajavie i pierapraviŭ jaho ŭ RAUS, milicyja adpraviła jaho ŭ haradski vybarkam.
«Pry adsutnaści pryčynaŭ dla ŭzbudžeńnia kryminalnaj spravy orhan daznańnia, śledčy, prakuror vynosiać matyvavanuju pastanovu ab admovie va ŭzbudžeńni kryminalnaj spravy, u rezalutyŭnaj častki jakoha vykładajecca rašeńnie… sa spasyłkaj na punkt, častku i artykuł Kryminalnaha kodeksa Respubliki Biełaruś, va ŭzbudžeńni kryminalnaj spravy pa jakich admaŭlajecca», — adznačyŭ Hubarevič u skarzie ŭ prakuraturu i na imia kiraŭnika Pieršamajskaha rajonnaha adździeła SK.
Pavodle zakanadaŭstva, rašeńnie pa ŭzbudžeńniu ci admovie u zaviadzieńni kryminalnaj spravy pavinna być pryniataje nie paźniej čym za troje sutak, a pry nieabchodnaści dadatkovaj pravierki — u termin da dziesiaci sutak. Hety čas moža być padoŭžany da adnaho miesiaca kiraŭnikom śledčaha padraździaleńnia ci prakuroram, a pravierka pa spravie — da troch miesiacaŭ.
«Praz 2,5 miesiacy mnoj da hetaha času nie atrymanaja pastanova pra zaviadzieńnie ci admovu va ŭzbudžeńni kryminalnaj spravy. Mnie taksama nie paviedamili pra praciahnieńnie terminaŭ razhladu majoj spravy», — padkreśliŭ Hubarevič.
Hubarevič patrabuje uzbudzić kryminalnuju spravu pa faktach falsifikacyjaŭ, a taksama pakarać adkaznaha za rasśledavańnie, piśmova paviedamiŭšy, jakija padrychtoŭčyja pracy byli zroblenyja.
Akramia taho, palityk źviarnuŭsia ŭ Śledčy kamitet za tłumačeńniami zakanadaŭstva. Palityk prosić paviedamić, jakija paŭnamoctvy jość u SK, kali viedamstva nie zmahło pryniać rašeńnie pa zajavie pa falsifikacyjach na vybarach.
«Vidavočna, što pavodle faktaŭ, prysutničaje kryminalnaje złačynstva», — prakamientavaŭ situacyju sajtu Pyx.by Juraś Hubarevič.
Pry hetym, jon ličyć, što rasśledavańnie spravy moža być davoli prostym: apytańnie naziralnikaŭ, vybarščykaŭ i źvierka pratakołaŭ i śpisaŭ vybarščykaŭ, kab paćvierdzić ci abvierhnuć fakt falsifikacyjaŭ. Ale, dadaŭ staršynia Ruchu, hetaha zroblena nie było: Śledčy kamitet nie znajšoŭ ničoha lepšaha, jak spuścić spravu ŭ RAUS, a RAUS — u haradskuju vybarčuju kamisiju.
Taki varyjant Hubareviča nie zadavalniaje: kaža, što «nie źviartaŭsia ŭ haradski vybarkam, jaki prava zavodzić kryminalnyja spravy nie maje».
«Ja prajdu ŭsie mahčymyja instancyi, nie dam uładam zamiać kradziež hałasoŭ maich vybarščykaŭ», — zaklučyŭ Juraś Hubarevič.
