Termin źniavoleńnia biełarusa Kiryły Silivončyka, jaki byŭ asudžany ŭ Rasii da dvuch hadoŭ kałonii-pasialeńnia za raźmiaščeńnie antyrasijskaha zapisu Ukantakcie, skončyŭsia 16 śniežnia. U sieradu, 21 śniežnia, Silivončyk viarnuŭsia ŭ Biełaruś.
Razmaŭlajučy z «Našaj Nivaj», Kiryła vykazaŭ radaść, što «ŭsio heta» skončyłasia.
«Nie kožnaha, chto adbyvaŭ pakarańnie ŭ Rasii, pa prylocie ŭ Biełaruś sustrakajuć žurnalisty, — pažartavaŭ jon. — Adčuvaju siabie dobra. Vielmi pryjemna, što za mianie tut ludzi chvalavalisia».
Kažučy pra ŭmovy ŭtrymańnia ŭ rasijskaj kałonii, Kirył ni na što nie narakaje.
«Umovy byli narmalnyja, usie normy vykonvalisia. Što da ježy — to była mahčymaść chadzić u kramu, što za terytoryjaj. Kali jość srodki — možna kupić što zaŭhodna. Nu my chadzili, hatavali, charčavalisia narmalna. Ale bolš siłaŭ dadavali listy ad ludziej — asabliva ad nieznajomych. Tyja słovy padtrymki, jany šmat značać».
Pakul što chłopiec nie kamientuje pryčyny, jakija padšturchnuli raźmiaścić na staroncy tuju vyjavu, jakaja stała padstavaj dla kryminalnaj spravy.
«Pakul nie chaču ničoha kazać, treba trochi asvoicca», — skazaŭ jon.
Kali my pierapytali inačaj — ci zrabiŭ by jon toje ž samaje, admataŭšy čas nazad, to Kirył skazaŭ, što jon prosta nie viedaŭ, što za dopisy ŭ sacyjalnych sietkach možna adkazać.
«Treba być razumniejšym i sačyć za tym, što pišaš na svajoj staroncy», — kaža Kirył Silivončyk.
«Jakaja kryminalnaja sprava? Ja navat nie dumaŭ pra heta. Ale ŭ sudzie paviarnuli spravu tak, što ja nibyta byŭ aŭtaram taho tekstu. Pakul bolš skazać nie mahu. Možna tolki jašče dadać, što i achoŭniki ŭ SIZA byli ździŭlenyja, u kałonii inšyja viaźni časam nie vieryli. Što da staŭleńnia, to palityčnych kanfliktaŭ u mianie tam ni z kim nie było. Tak, niekatoryja kosa hladzieli, časam u žart nazyvali banderaŭcam, ale ničoha bolej. Da biełarusaŭ u Rasii narmalnaje staŭleńnie, my ličymsia braterskim narodam, ale ja pakul nie hatovy davać svaju acenku takim śćviardžeńniam», — skazaŭ Kirył.
Pakul chłopiec płanuje adpačyć i ŭziacca za pošuki raboty, z čym, maŭlaŭ, u Biełarusi nie vielmi.
«Ja čaho ŭ Rasiju pajechaŭ uvohule? Ja tut u Homieli ničoha sabie znajści nie moh, šeść miesiacaŭ siadzieŭ biez pracy. Paśla mnie prapanavali miesca ŭ [Nižnim] Noŭharadzie, ja pajechaŭ zarablać. Ale paśla zdareńnia maje pracadaŭcy ad mianie adchryścilisia i zvolnili zadnim čysłom. Bolš u Rasiju ja jechać nie płanuju chacia b tamu, što na bližejšyja 5 hadoŭ ujezd tudy mnie zabaronieny», — padsumavaŭ Kirył.
