Historyja — svavolnaje dziaŭčo. Pakul usie čakali stahodździa revalucyi: adny, kab adśviatkavać i, pry mažlivaści, paŭtaryć, druhija byli nieparušnymi ŭ žadańni pieraduchilić, revalucyja čakać nie stała, pryjšła ŭ 2016. U jaje pakul niama nijakaj nazvy, što biezumoŭna minus, ale jaje nastupstvy my adčujem vielmi chutka, što taksama nie nadta plus.
Što zdaryłasia? Tramp? Brekzit? Biezumoŭna, heta, dyj nie tolki. Napačatku była admova Niderłandaŭ ratyfikavać uhodu z Ukrainaj, potym paraza Rency i, urešcie, zhortvańnie dziejnaści Biełsata. Usio heta padziei adnaha paradku — revalucyja ŭ śvietaadčuvańni ludziej. Inšymi słovami, adbyłasia admova ad prajektu hłabalnaha śvietu. Skončyŭsia pieryjad idei pabudovy adkrytaha hramadstva, raspačaty paśla Druhoj suśvietnaj vajny, — i voś novy vitok historyi, taki ž niepaźbiežny, jak klimatyčnyja pieryjady.
Naprykład, voźmiem kiejs ź Biełsatam, ciapier heta biełaruski kanał na polskija (jeŭrapiejskija) hrošy, vidać, chutka jon stanie vyrazna polskim i dobra kali na biełaruskaj movie. Pytańnie, hladzim my, biełarusy, jaho ci nie, dla palakaŭ niepryncypovaje, nastroj, zhodna z elektaralnymi vynikami, taki, što zhortvajem hłabalnaje i pačynajem svajo. Hetaksama dumajuć u Paryžy, Łondanie, Techasie, i nie skazać, što biespadstaŭna.
Hłabalizacyja tak i nie vyrašyła prablemy emihracyi, sacyjalnaj niaroŭnaści. Antyhłabalisty mohuć pačynać śviatkavać, śviet začyniajecca pa svaich kvaterach, i, kali raniej byli čakańni, što abjadnanyja krainy Jeŭropy nie buduć mieć kanfliktaŭ, zaraz harantyj niama. Nam tolki i zastajecca nadzieja, što demakratyčnyja instytuty vydužać, i, urešcie, ŭsio heta paspryjaje ahulnamu imunitetu.
A što Biełaruś? My, jak zaŭždy, pamiž tymi i hetymi, vypuścili maniety, dazvolili toje, nie zabaranili hetaha. Ale niešta źmianiłasia, jość adčuvańnie, što i dla nas 2016 byŭ hodam revalucyi. Hodam, kali na ŭsich uzroŭniach pieramahła kancepcyja «Kraina Biełaruś». Z Novym hodam! Usio budzie dobra!
