Jak raspaviała čytačka ej.by, zdareńnie adbyłosia ŭžo pad ranicu 1 studzienia. U milicyju pastupiŭ zvanok pra toje, što susiedzi ŭ domie 28 pa praśpiekcie haziety «Źviazda» zanadta šumiać i nie dajuć spać. Milicyja pa adrasie prybyła apieratyŭna, bo aporny punkt znachodziŭsia ŭ susiednim domie.
Pa słovach čytački, na vyklik prybyli try pravaachoŭniki, da jakich na placoŭku i vyjšaŭ haspadar kvatery, na šum u jakoj skardzilisia susiedzi. Samo saboj, 28-hadovy rabotnik AAT «Kieramin» byŭ vypiŭšy. Što zdaryłasia dalej, nichto nie bačyŭ, bo hości zastavalisia ŭnutry kvatery. Ale niečakana jany pačuli streły i vybiehli na placoŭku.
Da razhladu vypadku padklučyŭsia Śledčy kamitet. 28-hadovy žychar Minska znachodzicca ŭ reanimacyi ŭ ciažkim stanie.
Aficyjny pradstaŭnik HUUS Minharvykankama Alaksandr Łastoŭski raspavioŭ ej.by takuju viersiju padziej.
«Pavodle papiaredniaj infarmacyi, situacyja raźvivałasia tak. U 6.40 u milicyju pastupiŭ zvanok, što ŭ kvatery pa susiedstvie ŭsiu noč šum i homan, jaki pieraškadžaje adpačyvać. Treba razumieć, što u hetym haradskim adździele milicyi, kudy pastupiŭ zvanok, usiu noč ludzi na vyklikach byli, tamu na vyklik adpraŭlali, kaho mahli. Pa vykliku na miesca prybyŭ adzin supracoŭnik milicyi. Dźviery kvatery adkryŭ hramadzianin, jaki adrazu ž pačaŭ pavodzić siabie ahresiŭna i nieadekvatna. Jon pryčyniŭ supracoŭniku milicyi fizičnyja paškodžańni i sprabavaŭ zavałodać jaho tabielnaj zbrojaj. Supracoŭnik milicyi hetuju sprobu spyniŭ. Spačatku jon zrabiŭ vusnaje papiaredžańnie, potym — papieradžalny streł. Hramadzianin na heta nie adreahavaŭ, i tady supracoŭnik milicyi zrabiŭ dva streły i paraniŭ debašyra. U vyniku hramadzianin dastaŭleny miedycynskuju ŭstanovu, praapieravany i jaho žyćciu ničoha nie pahražaje. Supracoŭnik milicyi dastaŭleny z špital MUS z čerapna-mazhavoj traŭmaj. Pa dadzienym fakcie ŭzbudžanaja kryminalnaja sprava pa st.363 č.2 Kryminalnaha kodeksa Biełarusi (supraciŭ supracoŭniku orhanaŭ unutranych spraŭ abo inšaj asobie, jakija achoŭvajuć hramadski paradak)», — rastłumačyŭ Alaksandr Łastoŭski.
