Siońnia ŭ rehijonach Biełarusi na sumiesnych pasiedžańniach abłvykankamaŭ i prezydyjumaŭ abłasnych savietaŭ byli sfarmavanyja 110 akruhovych vybarčych kamisijaŭ.
U skład akruhovych vybarčych kamisijaŭ ułada ŭklučyła i niekatorych pradstaŭnikoŭ apazycyi. Na apošnich parlamanckich vybarach u 2004 h. miesca apazycyjaneram nie znajšłosia.
BIERAŚCIE
Infarmacyja pra papiarednija vyniki pakul niapoŭnaja. Paviedamlaje staršynia Bieraściejskaj abłasnoj arhanizacyi BSDP (Hramada) Ihar Masłoŭski:
“Pasiedžańnie prajšło vielmi chutka. Prajekt rašeńnia byŭ zahadzia padrychtavany. Tamu faktyčna nie było abmierkavańnia kandydatur. I ŭ vyniku z 26 pradstaŭnikoŭ abłasnoj kaalicyi ADS, jakija byli vyłučany ad partyj i hramadzkaha abjadnańnia BNF “Adradžeńnie”, było ŭklučana 6 kandydataŭ. Piśmovaha paćvierdžańnia pakul nie atrymali, ale vusna nas zapeŭnili, što ŭ vybarčyja kamisii ŭklučanyja: ad BSDP (Hramada) — 1 pradstaŭnik; ad PKB — 1; ad BNF — 2; ad AHP — 2”.
MAHILOŬ
Na Mahiloŭščynie -- trynaccać akruhovych vybarčych kamisijaŭ. Svaich pradstaŭnikoŭ apazycyja budzie mieć u dźviuch ź ich. Heta — staršynia rehijanalnaj arhanizacyi Partyi kamunistaŭ Biełaruskaj Valer Bierazijenka j vyłučeniec ruchu BNF “Adradžeńnie” Piotar Mihurski.
A ŭsiaho apazycyjnyja arhanizacyi vyłučali ŭ kamisii 20 svaich pradstaŭnikoŭ.
Pavodle staršyni rehijanalnaj arhanizacyi Partyi BNF Ryhora Kastusiova, čynoŭniki arhumentavali nieŭklučeńnie ŭ kamisii bolšaj kolkaści frontaŭskich pradstaŭnikoŭ tym, što jany ludzi stałaha vieku j biespracoŭnyja. Palityk davodzić, što takich było tolki troje. Akramia taho, zaznačaje spadar Kastusioŭ, čynoŭniki nie ŭklučyli ŭ kamisii viadomych u Mahilovie ludziej — deputata harsavietu Alaksandra Ahiejeva j historyka Ihara Puškina, i nijak hetaha nie arhumentavali:
“Im nia vyhadna, kab u kamisijach byli pradstaŭniki demakratyčnych arhanizacyjaŭ. Jany zaćvierdzili bolš tych ludziej, jakija buduć hałasavać tak, jak im patrebna, i jakija buduć padpisvać pratakoły i čystyja blanki, a taksama zaćviardžać tyja ličby, jakija nieabchodnyja buduć uładnym strukturam”, – paviedamiŭ Ryhor Kastusioŭ.
Kiraŭnik vybarčaha štabu abłasnoj kaalicyi demakratyčnych sił Mahiloŭščyny Jury Novikaŭ nia bačyć vialikaha dasiahnieńnia ŭ tym, što ŭ akruhovyja vybarčyja kamisii patrapili dvoje pradstaŭnikoŭ apazycyi:
“Prosta na Biełarusi skłałasia takoje stanovišča — uładzie nieabchodna pakazać, što jość u nas demakratyja. Voś, hladzicie, my i apazycyi dajom svabodu dziejańnia. Ale heta ŭsio vyhladaje pakul sumnieŭna. Napieradzie ŭ nas samyja hałoŭnyja pracesy, i nakolki jany hatovyja hulać u demakratyju šyrej, pahladzim dalej”.
HOMIEL
Siońnia ŭ Homieli namieśnik načalnika ŭpraŭleńnia arhanizacyjna-kadravaj pracy abłvykankamu Alaksandar Usaŭ zajaviŭ, što ŭ skład 13 akruhovych kamisij uklučany pradstaŭniki apazycyjnych palityčnych partyjaŭ i demakratyčnych hramadzkich arhanizacyj.
Kamentuje Śviatłana Haldade, siabra AHP, jakaja raniej pracavała ŭ Homielskaj-Jubilejnaj akruzie № 31, ale ciapier nie prajšła:
“U hetych kamisijach ničoha nie vyrašajecca. Hetyja kamisii tolki zaćviardžajuć tyja vyniki, jakija ŭžo źmianić nielha. Usio falšujecca va ŭčastkovych kamisijach. I ja nia dumaju, što kali ŭ ich skład uvojdzie niechta ad apazycyi, to zdoleje damahčysia spraviadlivaści. Bo na siońnia sytuacyja ŭ vybarach — tupikovaja!”
VICIEBSK
U Viciebskaj vobłaści sfarmavana 14 vybarčych akruhovych kamisij, u skład jakich uvajšli 182 čałavieki, u tym liku pradstaŭniki 6-ci partyj i 7-mi hramadzkich ab”iadnańniaŭ.
Pavodle aficyjnaj infarmacyi, kolkaść partyjcaŭ składaje 10% ad ahulnaha liku čalcoŭ kamisij. U akruhovyja kamisii trapili pradstaŭniki Ahrarnaj partyi, KPB, PKB, BSDP “Hramada”, AHP i BNF. Viadoma, što ahulnaja kolkaść siabraŭ partyj, jakich zarehistravali ŭ kamisii, --18 čałaviek, ale kolki ź ich pradstaŭlajuć apazycyjnyja partyi, pakul nie paviedamlajecca.
Niezaležnych žurnalistaŭ, jakija chacieli prysutničać pry farmavańni kamisij, na sumiesnaje pasiedžańnie abłvykankamu i prezydyjumu abłasnoha savietu nie dapuścili. Pra hetaje parušeńnie karespandent hazety «Tovariŝ» Mikałaj Pietrušenka napisaŭ u Knizie skarhaŭ i ciapier čakaje na piśmovy adkaz čynoŭnikaŭ.
