26-hadovy Michaił T. paviesiŭsia ŭ kamery Škłoŭskaj kalonii № 17. Trahiedyja zdaryłasia 15 studzienia.
Pra heta paviedamiŭ były palitviazień Mikita Lichavid, jaki paśla vychadu z kalonii, dzie siadzieŭ za Płošču, akazvaje pravavuju dapamohu viaźniam biełaruskich kalonij i turmaŭ.
Pavodle Mikity Lichavida, źviestki pra śmierć viaźnia jamu paćvierdzili krynicy ŭ Škłoŭskaj kalonii, jakija nazvać jon nia moža.
«Viadoma, što heta adbyłosia ŭ kamery ŠYZA. Paviesiŭsia siedziačy, začapiŭ viaroŭku za batareju i hetak udaviŭsia. Jak čałaviek, jaki byvaŭ u takich umovach, skažu, što heta mahčyma», — skazaŭ Mikita Lichavid.
Pra Michaiła T. viadoma, što jon adbyvaŭ 12 hadoŭ pavodle artykuła ab zabojstvie. Da incydentu niekalki hadoŭ adbyŭ u turmie, bo nie padpisvaŭ papieru ab zhodzie stać na šlach vypraŭleńnia. Ale potym padpisaŭ, i jaho viarnuli ŭ Škłoŭskuju kaloniju adsiedžvać dalej.
Pavodle pravaabaroncy, Michaiłu T. nibyta pahražali, što jaho znoŭ adpraviać u turmu. Jak miarkujuć krynicy ŭ kalonii, viazień adkazaŭ na hetyja pahrozy samahubstvam.
Dziažurny Departamentu vykanańnia pakarańniaŭ MUS padpałkoŭnik Čarnoj nie paćvierdziŭ, ale i nie abvierh źviestki pra samahubstva viaźnia T. ŭ Škłoŭskaj kalonii.
«Ničoha nie mahu skazać. Źviartajciesia praz aficyjny zapyt da kiraŭnictva pa hetuju infarmacyju», — adkazaŭ dziažurny.
Na pačatku 2016 hodu ŭ Žodzinskaj turmie sprabavaŭ paviesicca viazień Jahor Pratasienia. Pierad sprobaj suicydu jon paviedamlaŭ svajakam, što ź jaho ździekavalisia milicyjanty, jakija nibyta sfalšavali jahonuju spravu. U vyniku chłopiec trapiŭ u komu i pamior praz 3 miesiacy, tak i nie pryjšoŭšy ŭ śviadomaść. Pravierka MUS i SK nie znajšła prykmiet daviadzieńnia Jahora Pratasieni da suicydu.
