Ruch «Za Svabodu» raspačaŭ kampaniju ŭ padtrymku žycharoŭ Biełarusi, abvieščanych dziaržavaj «darmajedami», paviedamlaje pres-słužba.
«Dekret № 3 — heta nonsens, nidzie ŭ Jeŭropie niama padobnych mieraŭ, jakija prymianiajuć da biespracoŭnych. Biełaruskija ŭłady ŭsio nie mohuć pryznać, što adsutnaść raboty — nie vina, a biada čałavieka, a fryłansier pa sutnaści ničoha nie vinavaty dziaržavie, bo vypłačvaje, naprykład, PDV», — prakamientavaŭ kampaniju staršynia ruchu «Za svabodu» Juryj Hubarevič.
«My hatovyja dapamahčy tym, chto hatovy pazmahacca ź dziaržavaj i davieści spravu da Kamiteta pa pravach čałavieka», — dadaŭ Hubarevič.
Jurysty Ruchu «Za Svabodu» hatovyja dapamahčy ŭ padrychtoŭcy skarhi ŭ padatkavuju i prakuraturu, a taksama prajści ŭsie sudovyja instancyi.
***
Nahadajem, što 12 studzienia Alaksandr Łukašenka padpisaŭ dekret № 1, jakim ŭniesieny źmieny ŭ dekret «Ab praduchileńni sacyjalnaha ŭtrymanstva». U dekrecie ŭdakładnili śpis tych, chto nie pavinien płacić padatak za niaŭdzieł u finansavańni dziaržaŭnych vydatkaŭ.
Da darmajedaŭ nie buduć adnosić členaŭ nacyjanalnaj zbornaj pa vidach sportu, taho, chto prachodzić alternatyŭnuju słužbu. A voś biespracoŭnych, jakija stajać na ŭliku ŭ centry zaniataści abo prachodziać navučańnie pa nakiravańni orhana pa pracy, zaniatasci i sacyjalnaj abaronie, nie buduć adnosić da darmajedaŭ tolki «pry adsutnaści ustanoŭlenych faktaŭ parušeńnia imi abaviazkaŭ u halinie zaniataści nasielnictva».
Najbolšuju dyskusiju vyklikaŭ punkt, što baćki, jakija vychoŭvajuć dziaciej da 7 hadoŭ, nie buduć płacić padatak na darmajedstva tolki ŭ tym vypadku, kali dzicia va ŭzroście ad 3 da 7 hadoŭ nie atrymlivaje daškolnuju adukacyju.
Miascovyja vykanaŭčyja abo rasparadčyja orhany mohuć vyzvalać ad vypłaty zboru tych, chto znachodzicca ŭ ciažkaj žyćciovaj situacyi.
Taksama na minułym tydni paviedamlałasia, što Minpadatku razasłała 400 tys. «listoŭ ščaścia» — paviedamleńniaŭ ab nieabchodnaści vypłaty padatku.
