27 sakavika minułaha hoda ŭ Minsku zdaryłasia trahiedyja. U adnoj z kvater minskaha mikrarajona Sucharava znajšli miortvaje vaśmimiesiačnaje niemaŭla z mocnymi ranieńniami. A pobač ź im — ščania parody chaski. Vinavataj u śmierci dziciaci pryznali jaho maci. Na pracesie vyśvietliłasia, što jana niekalki sutak nie karmiła sabaku, i chaski adhryz ruku dziciaci, pakul maci, jakaja była ŭ stanie ałkaholnaha apjanieńnia, spała ŭ inšym pakoi. 11 žniŭnia žančynu pryhavaryli da troch hadoŭ pazbaŭleńnia voli i štrafu pamieram 4200 rubloŭ. Sabaku rašeńniem suda pastanavili viarnuć zavodčyku.
Praź piać miesiacaŭ paśla zaviaršeńnia suda i prysudu chaski pa mianušcy Ajda pa-raniejšamu znachodzicca ŭ valjery pradpryjemstva «Faŭna horada» na vulicy Hurskaha. Na jaje nievialikim valjery visić šylda «Nie vydajecca. Viadziecca śledstva». Sabaku nielha pryjści i zabrać, jak inšych hadavancaŭ z Hurskaha. Nie zabraŭ jaje i zavodčyk.
«Ja chacieŭ zabrać sabaku. Navat zvaniŭ paśla suda na Hurskaha, razmaŭlaŭ ź vieterynaram i z dyrektaram. Jany mnie paviedamili, što addaduć Ajdu tolki kali ja zapłaču za jaje ŭtrymańnie. I nazvali košt — šeść ci dzieviać miljonaŭ (starymi) za try miesiacy. Heta ž nierealna. Haścinica dla žyvioł kaštuje dziesiać rubloŭ za sutki. Adkul takija hrošy? Ja vyrašyŭ, što jaje zabrać nie mahu. Absalutna čystaje maładoje ščania chaski ciapier kaštuje 500 rubloŭ prykładna, z usimi dakumientami. A tut jana, jakaja praviała stolki času ŭ valjery. Užo i karekciroŭku pavodzinaŭ, vidać, treba rabić», — raskazvaje zavodčyk Ajdy Alaksandr.
Ajdu, u adroźnińnie ad bolšaści inšych sabak, jakija žyvuć na Hurskaha, niemahčyma prosta tak zabrać z «Fauny horada».
Dyrektar «Faŭny horada» Tamara Carykoŭskaja cikavaść z boku zavodčyka Ajdy admaŭlaje.
«Nie viedaju, da kaho jon źviartaŭsia, ja ź im nie razmaŭlała. My hatovyja addać sabaku zavodčyku, kali jon z nami źviažacca, — raskazvaje Carykoŭskaja. Jana taksama dadaje, što ahučanaja zavodčykam Alaksandram suma ŭ 6-9 miljonaŭ — niapraŭda. — Ja nie hatovaja vam ciapier nazvać sumu, jakuju my zapatrabujem u dadzienym vypadku z zavodčyka. My hatovyja razhledzieć varyjanty, kab addać sabaku. Sumu ŭ dzieviać miljonaŭ jamu nichto nie nazyvaŭ, takoj havorki nie viałosia. Uvohule, u nas sutki ŭtrymańnia sabaki kaštujuć 4 rubli 12 kapiejek. Ale ŭ vypadku Ajdy my hatovyja razhledzieć varyjanty».
Viadomaja ŭ Biełarusi zavodčyca chaski Maja Vachranava raskazała, što pra niaprostuju historyju Ajdy viedaje.
«Razumiejecie, ciapier ceny na ščaniat chaski rezka ŭpali. Užo za 200-300 dołaraŭ možna nabyć sabačku z usimi dakumientami. Chto budzie płacić za Ajdu? Jana, viadoma, užo advykła ad chatniaha ŭtrymańnia, stolki času žyvie ŭ valjery siarod inšych sabak. Mabyć, jaje ŭžo i sterylizavali tam, na Hurskaha, tady jana nie prydatnaja dla raźviadzieńnia. Ja b chacieła sama jaje zabrać, da siabie. Ale žyvu ŭ centry horada amal, u mianie doma try kabiali chaski. Ja nie mahu jaje ŭziać. Pastarajusia spytać u ludziej, mahčyma, niechta voźmie Ajdu sabie. Kali nie, to jaje, vidać, mohuć tam usypić», — kaža Vachranava.
Jeŭraradyjo budzie sačyć za dalejšym losam chaski Ajdy, jakaja praz čałaviečuju niadbajnaść trapiła ŭ vielmi niaprostuju situacyju.
