20 studzienia projdzie finał nacyjanalnaha adboru na «Jeŭrabačańnie». Sioleta pieramožcy pajeduć pradstaŭlać Biełaruś u stalicu Ukrainy — Kijeŭ.
Finalisty nacyjanalnaha adboru na «Jeŭrabačańnie-2017».
Jak i kožny hod, vakoł biełaruskaha finału stvarajecca šmat intryh. Letaś Biełaruś pradstaŭlaŭ Ivan — prateže rasijskaha kampazitara Viktara Drobyša. Tady ŭ «narodnym hałasavańni» jon nibyta atrymaŭ bolš za 23 tysiačy hałasoŭ.
Treba adznačyć, što na druhim miescy tady ŭ śpisie byŭ hurt Napoli. Paśla parazy pradziusar hurta zajaviŭ u svaim fejsbuku, što hałasy, addanyja za ich hurt, byli nabytymi: «Vielmi ździŭlusia, kali chto-niebudź z vas vieryć, što za małaviadomaha Sašu Ivanova (sapraŭdnaje imia Ivan'a) biełarusy adpravili 23 167 zvankoŭ i sms-ak. Takich ličbaŭ nie było ŭ adborach, napeŭna, ni ŭ kaho. Sapraŭdy hetak ža, jak i toje, što za Napoli na ŭłasnym entuzijaźmie ludzi adpravili 22 399 hałasoŭ».
Cikavym faktam źjaŭlałasia jašče i toje, što niezadoŭha da finału nacyjanalnaha adboru Alaksandr Łukašenka ŭručyŭ Viktaru Drobyšu orden Francyska Skaryny. Ci nie była pieramoha Alaksandra Ivanova abumoŭlenaja padtrymkaj dziaržavy?
Hety fakt možna paćvierdzić u vypadku, kali sioleta pieramoža toj, kaho padtrymajuć dziaržaŭnyja struktury. Voś, naprykład, dopis, jaki BRSM publikuje na svajoj staroncy ŭ sacsietkach:
«Našy siabry i partniory hurt «PROvokacija» pazmahajucca za prava pradstaŭlać našu krainu na konkursie «Jeŭrabačańnie-2017» u Kijevie! Zyčym Marku i Arciomu ŭdačy! Padtrymajem talenavitych chłopcaŭ na finale Jeŭrafestu! Hałasujem za №13!!!», — havorycca ŭ paviedamleńni. Čym mienš zastajecca času da finału nacyjanalnaha adboru, tym bolš u supołcy BRSM źjaŭlecca dopisaŭ pra hurt «PROvokacija». Voś pieśnia, ź jakoj jany chočuć pieramahčy na «Jeŭrabačańni»:
Fota z aficyjnaj supołki hurta.
Ale sioleta vyznačać pieramožcu buduć nie tolki hledačy, bo 50% hałasoŭ naležać žury. Tamu navat pry vialikaj padtrymcy adnaho hurtu, jość imaviernaść pieramohi inšaha vykanaŭcy. Pra hetyja i inšyja aśpiekty nacyjanalnaha finału my pahutaryli ź Siarhiejem Andryjanavym, jaki ŭ svoj čas zajmaŭsia pijaram Tea i Aleny Łanskoj, a sioleta byŭ siabram žury adboračnaha etapu finału nacyjanalnaha adboru.
Fota: Darja Burakina
NN: Siarhiej, ty siabra žury, chto tvoj favaryt u hetym hodzie?
Siarhiej Andryjanaŭ: Ja ad samaha pačatku sačyŭ za vykanaŭcami, čytaŭ ich intervju, słuchaŭ aranžyroŭki i sačyŭ za ich pijar-kampanijami. I moj favaryt, jakomu ja addaŭ 12 bałaŭ — hurt Nuteki. Akramia taho, hurt z Babrujska, a hety horad śviatkuje 630-hodździe i ŭ 2017-m źjaŭlajecca kulturnaj stalicaj. Tamu budzie cudoŭna, kali ŭ nastupnym hodzie «Jeŭrabačańnie» projdzie ŭ Babrujsku.
Pieśnia, ź jakoj Nuteki chočuć vystupić na «Jeŭrabačańni».
Hurt maje biełaruskamoŭnuju viersiju hetaj pieśni. U finale jany abiacali praśpiavać apošni kuplet na rodnaj movie:
SA: U ich jość videaklip, u ich jość dobraja aranžyroŭka, jany majuć šmat fanataŭ u Biełarusi i za ich miežami, i jany majuć navat biełaruskamoŭnuju viersiju svajoj pieśni. Heta ich čaćviortaja sproba, ale mnie padajecca, što hurt zasłuhoŭvaje sioleta pajechać u Kijeŭ.
Hurt Nuteki.
Biezumoŭna, ja nie baču pakul ni kaściumaŭ, ni finalnych vystupaŭ, tamu aryjentujusia tolki na toje, što jość ciapier. Nu druhim miescy ŭ maim topie — Mikita Chodas, na trecim — Uładzisłaŭ Kurasaŭ.
Pieśnia Mikity Chodasa ŭ finale nacyjanalnaha adboru.
Fota Mikity Chodasa z sacsietak.
Pieśnia Uładzisłava Kurasava ŭ finale nacyjanalnaha adboru.
Uładzimir Kurasaŭ — ukrainski vykanaŭca biełaruskaha pachodžańnia (naradziŭsia ŭ Breście), finalist šoŭ «Ch-Faktar-2». Fota wikipedia.org
NN: A što viadoma pra hurt «PROvokacija»? BRSM sapraŭdy aktyŭna ich padtrymlivaje?
SA: Ja viedaŭ, što za hetym hurtom staić padtrymka BRSM. Ich pradziusar — Anatol Čepikaŭ, jon ža dyrektar radyjostancyi «Piłot-FM», a nakolki my viedajem, u hetaj radyjostancyi jość padtrymka BRSM. Tamu ja navat nie vyklučaju, što na pieršym miescy pa hladackim hałasavańni budzie mienavita hurt «PROvokacija». Ja byŭ by nie suprać, kali b u ich była dobraja kampazicyja i dobraja padrychtoŭka da takoha surjoznaha konkursu.
NN: A što tyčycca hurtu «Napoli», jakija adznačylisia ŭ minułym hodzie svaim nakručvańniem hałasoŭ, ale sprabujuć znoŭ udzielničać u konkursie?
SA: Heta adna z pryčyn, čamu ja nie baču hurt «Napoli» u finale. Uvohule, na maju dumku, kampazicyja zaŭsiody sama za siabie havoryć. Mnohija vykanaŭcy, jakija chočuć vystupić na «Jeŭrabačańni», nie da kanca razumiejuć, čamu jany tudy chočuć. A dla taho, kab być adnaznačnym pieramožcam, pavinna być charyzma, enierhietyka, historyja, hust i jašče šmat rečaŭ. Ale z ulikam letašniaj situacyi ja nie vyklučaju, što «Napoli» mohuć być u lidarach — pa tym ža pryncypie, što i «PROvokacija».
Pieśnia hurtu «Napoli», ź jakoj jany chočuć pajechać na «Jeŭrabačańnie».
Volha Šymanskaja, jakaja budzie pradstaŭlać «Napoli» u finale nacyjanalnaha adboru. Fota z Ukantakcie.
CA: A zrazumieć usio heta prosta, bo kali pahladzieć apošnija adbory, to čałaviek, jaki zajmaje druhoje-treciaje miesca «biez nakrutak», maje 4 tysiačy hałasoŭ, maksimum 5. A kali razryŭ u 3-4 razy, to, mnie padajecca, usio zrazumieła. Tamu mnie b chaciełasia, kab sioleta prajšło ŭsio sumlenna. Toje, što žury pastavić spraviadlivyja adznaki — ja ŭ hetym nie sumniajusia. Tamu ja zyču ŭsim 13 vykanaŭcam, kab jany dakazali, što nie prosta tak jany ŭ finale nacyjanalnaha adboru na Jeŭrabačańnie».
Ale vakoł hurtu «Nuteki» sioleta skłałasia dziŭnaja situacyja. Kiraŭnik «Art-siadziby» Pavieł Biełavus vykłaŭ skrynšot, dzie nieviadomy čałaviek prapanavaŭ prahałasavać za hurt «Nuteki», bo sam Pavieł znachodziŭsia ŭ aficyjnaj supołcy hurtu. Pry hetym krainu hurta pradstavili «Biełoruśsijej». Pavieł aburyŭsia i napisaŭ adkaz:
Pry hetym jon paprasiŭ hurt navučyć fanataŭ pravilna pramaŭlać nazvu krainy. Juryj Barbuk, mieniedžar «Nuteki», vybačyŭsia za taki incydent i na zajavu pra pakupku botaŭ, jakija ahitujuć za hurt, zapeŭniŭ, što jany nie vydatkoŭvali hrošaj na heta.
Biezumoŭna, što ŭ takim pijary niama ničoha nielehalnaha. I sapraŭdy, hurty «Nuteki» i «Napoli» bolš viadomyja ŭ Biełarusi, čym, naprykład, hurt «PROvokacija». Bolš dziŭna budzie vyhladać, kali za nieviadomy krainie hurt prahałasujuć dziasiatki tysiač čałaviek.
Taksama siarod finalistaŭ, jakija hučać u ŚMI i internecie — hurt Navi, jaki druhi raz sprabuje pieramahčy ŭ nacyjanalnym adbory. Jak i letaś, jany vystupajuć ź biełaruskamoŭnaj pieśniaj:
Hurt, biezumoŭna, zajmieŭ vialikuju padtrymku siarod biełaruskamoŭnych. Pa słovach hurtu, kali sioleta jany nie zdabuduć pieramohu, imavierniej, što heta budzie ich apošniaja sproba ŭdziełu u konkursie.
Fota z sacsietak.
