Aleś Čobat adzin žyvie ŭ staroj chacie ŭ Skidzieli. Užo niekalki dzion praz płatformu «Tałaka» idzie zbor srodkaŭ, kab materyjalna dapamahčy žurnalistu i paetu.
Arhanizataram zboru dapamohi staŭ žurnalist telekanała «Biełsat» Źmicier Jahoraŭ:
— Ja žurnalist, a nie hramadski dziejač, ja nikoli raniej nie zajmaŭsia padobnymi prajektami. Ale ja pabačyŭ, što jość vialikaja achvota ŭ inšych ludziej dapamahčy.
Hrodzienski žurnalist Aleś Dzianisaŭ pra dapamohu Čobatu daviedaŭsia vypadkova. Jon pačaŭ zapis alboma na słovy Čobata i daviedaŭsia, što paŭstała kampanija ŭ jaho padtrymku:
— Ja padtrymlivaju hetuju akcyju dapamohi. Nie viedaju, nakolki heta budzie efiektyŭna. Tam źbirajucca viebmani, a ŭ bolšaści ludziej niama hetych viebmaniej. Ale pry žadańni heta možna ŭsio pieravieści… My ŭvieś čas pavinny dumać pra ludziej, jakim my možam dapamahčy, choć niečym. I Čobat akurat taki čałaviek. I heta nie prosta čałaviek, a vydatny paet, i ŭ niejkim sensie ŭvaha da jaho bolšaja i jon zasłuhoŭvaje hetaj uvahi.
Za tydzień praz «Tałaku» sabrana ŭžo bolš za 1000 rubloŭ, chacia zapatrabavanaja suma dla zboru była ŭ 2 razy mienšaja. Aproč hetaha Źmicier Jahoraŭ zabraŭ hrošy ŭ dapamohu Čobatu ŭ Varšavie, a častku hrošaj prynieśli hrodzienskaj paetcy Danucie Bičel, što apiakujecca Čobatam.
Paśla zboru srodkaŭ hrodziency źbirajucca arhanizavać realnuju tałaku, kab davieści da ładu chatu, u jakoj žyvie Aleś Čobat.
Aleś Čobat — žurnalist i paet, aślep paśla apieracyi ŭ 2013 hodzie. Čobat u pačatku 1990-ch hadoŭ paśpieŭ papracavać reparcioram i ahladalnikam tydniovikaŭ «Pierśpiektiva», «Hrodnienskije novosti», «Hrodnienskaja niediela», mieŭ dačynieńnie da stvareńnia ŭ horadzie haziety «Reanimova».
