Ekśpierty Ahienctva pa charčovych standartach (FSA) Vialikabrytanii papiaredžvajuć, što chleb i bulbu treba smažyć da atrymańnia załacistaj, a nie karyčnievaj skarynki, kab paźbiehnuć spažyvańnia akryłamidu, jaki moža vyklikać rak.
Akryłamid vypracoŭvajecca ŭ tym vypadku, kali pradukty, što ŭtrymlivajuć kruchmał, smažacca ŭ tostary, na patelni abo na hryli ciaham zanadta doŭhaha času abo pry zanadta vysokaj tempieratury.
Najbolš vysokija ŭzroŭni ŭtrymańnia akryłamidu byli zafiksavanyja ŭ praduktach z vysokim utrymańniem kruchmału (chleb, bulba, krupy, pirahi, kava), jakija hatavalisia pry tempieratury zvyš 120 hradusaŭ Celsija.
Kali chleb padsmažvajecca ŭ tostary, to čym ciamniejšy koler jaho skarynki, tym bolš u toście akryłamidu, papiaredžvajuć navukoŭcy.
Dośledy na žyviołach pakazali, što akryłamid paškodžvaje DNK i vyklikaje rakavyja puchliny, adnak navukoŭcy pakul nie mohuć z upeŭnienaściu skazać, što na čałavieka heta rečyva akazvaje anałahičny ŭpłyŭ.
Pry hetym śpiecyjalisty FSA aścierahajucca, što ŭ siarednim sučasny čałaviek spažyvaje zanadta vialikuju kolkaść akryłamidu, i rekamiendujuć prytrymlivacca zdarovaj dyjety.
Akryłamid taksama ŭtrymlivajecca ŭ tytuniovym dymie, tamu kurcy spažyvajuć jaho ŭ try-čatyry razy bolš, čym ludzi, jakija nie palać.
FSA taksama nie rekamienduje zachoŭvać bulbu ŭ chaładzilniku, bo pry nizkich tempieraturach ŭ joj pavyšajecca ŭzrovień cukru, što patencyjna moža pryvieści da rostu vypracoŭki akryłamidu pry padrychtoŭcy straŭ.
