Časopis Bulletin of Atomic Scientists pierasunuŭ strełku Hadzińnika Sudnaha dnia na 30 siekund napierad z-za vykazvańniaŭ Donalda Trampa i raspaŭsiudžvańnia nacyjanalizmu ŭ śviecie. Ab hetym paviedamlajecca na sajcie vydańnia.
Na dumku ekśpiertaŭ, napružanaść u śviecie pavialičyłasia z-za vykazvańniaŭ Trampa ab vykarystańni i raspaŭsiudzie jadziernaj zbroi i jaho hrebavańnia prablemami klimatyčnych źmianieńniaŭ. Akramia taho, pryčynaj staŭ rost nacyjanalistyčnych nastrojaŭ pa ŭsim śviecie.
Zaraz hadzińnik znachodzicca za 2,5 chviliny ad hłabalnaj katastrofy.
Apošni raz tak blizka da jaje śviet znachodziŭsia ŭ 1984 hodzie, kali adbyłasia eskałacyja honki ŭzbrajeńniaŭ pamiž Rasijaj i ZŠA. Tady hadzińnik pakazvaŭ biez troch chvilin apoŭnač. Bližej za ŭsio da apoŭnačy hadzińnik znachodziŭsia ŭ 1953 hodzie. Jon pakazvaŭ 23:58, bo ZŠA i SSSR vyprabavali pieršyja termajadziernyja bomby.
Hadzińnik Sudnaha dnia byŭ prydumany časopisam Čykahskaha univiersiteta Bulletin of Atomic Scientists. Upieršyniu jon źjaviŭsia na vokładcy časopisa ŭ 1947 hodzie, kali ZŠA vyprabavali jadziernuju bombu.
Čas da 00:00 aznačaje napružanaść mižnarodnaj abstanoŭki ŭ śviecie i raźvićcio jadziernaj zbroi. Čym bližej strełka da 00:00, tym bližej śviet da hłabalnaj katastrofy. Nakolki i ŭ jaki bok pierasunuć strełku vyrašaje rada dyrektaraŭ časopisa i zaprošanyja ekśpierty, u pryvatnaści łaŭreaty Nobieleŭskaj premii.
Padčas pieradvybarčaj kampanii Tramp zajaŭlaŭ pra mahčymaść vykarystoŭvać jadziernuju zbroju suprać terarystaŭ. U śniežni jon pisaŭ u svaim tvitery, što nieabchodna «značna ŭzmacnić i pašyryć jadziernyja mahčymaści» ZŠA.
