Dziaržaŭny doŭh Biełarusi na 1 studzienia 2017 hoda skłaŭ 37 młrd rubloŭ i pavialičyŭsia ŭ paraŭnańni z pačatkam 2016 hoda na 4,1 młrd rubloŭ, abo na 12,5%, paviedamlaje Ministerstva finansaŭ.Źniešni dziarždoŭh pa stanie na 1 studzienia 2017 hoda skłaŭ 13,6 młrd dołaraŭ ZŠA, pavialičyŭšysia z pačatku 2016 hoda na 1 młrd 198,8 młn dołaraŭ, abo na 9,6%.
U studzieni—śniežni 2016 hoda pryciahnutyja źniešnija dziaržaŭnyja pazyki na 1 młrd 934,9 młn dołaraŭ: 800 młn dołaraŭ — Jeŭrazijskaha fondu stabilizacyi i raźvićcia; 552 młn dołaraŭ — urada i bankaŭ Rasijskaj Fiederacyi; 446,9 młn dołaraŭ — bankaŭ KNR; 134,2 młn dołaraŭ — MBRR; 1,8 młn dołaraŭ — JEBRR i Paŭnočnaha inviestycyjnaha banku (SIB).
Na pahašeńnie źniešniaha dziarždoŭhu ŭ 2016 hodzie nakiravana 892,4 młn dołaraŭ: 353,1 młn dołaraŭ — Jeŭrazijskamu fondu stabilizacyi i raźvićcia; 300 młn dołaraŭ — uradu Rasijskaj Fiederacyi; 184,2 młn dołaraŭ — bankam KNR; 51,4 młn dołaraŭ — MBRR; 3,6 młn dołaraŭ — ZŠA; 0,1 młn dołaraŭ — JEBRR i SIB.
Pavodle danych Minfina, unutrany dziarždoŭh pa stanie na 1 studzienia 2017 hoda skłaŭ 10,2 młrd rubloŭ, pavialičyŭšysia z pačatku hoda na 0,5 młrd rubloŭ, abo na 5%.
Za studzień—śniežań 2016 hoda raźmieščana ŭnutranych valutnych i rublovych dziaržaŭnych ablihacyj dla jurydyčnych i fizičnych asob na 1 młrd 642,5 młn dołaraŭ ZŠA i 543,7 młn rubloŭ. Kampiensavana valutnych i rublovych dziaržaŭnych ablihacyj dla jurydyčnych i fizičnych asob na 1 młrd 502,6 młn dołaraŭ ZŠA i 599,5 młn rubloŭ.
Na dumku šerahu ekanamičnych ekśpiertaŭ, biełaruski ŭrad nie maje inšych krynic pahašeńnia daŭhoŭ, akramia źniešnich zapazyčańniaŭ. U 2017 hodzie nieabchodna nakiravać na pahašeńnie dziaržaŭnaha doŭhu 5 młrd 232,2 młn rubloŭ. Pahašeńnie dziaržaŭnaha doŭhu ŭ zamiežnaj valucie składzie 2 młrd 311 młn dołaraŭ ZŠA.
Pry hetym u 2017 hodzie płanujecca pryciahnuć 1 młrd 860 młn dołaraŭ ZŠA (4 młrd 83,4 młn rubloŭ): za košt troch tranšaŭ kredytu Jeŭrazijskaj fondu stabilizacyi i raźvićcia — 700 młn dołaraŭ, vypusku jeŭraablihacyj — 800 młn dołaraŭ, vypusku ŭnutranych dziaržablihacyj — 360 młn dołaraŭ.
Nahadajem, za 2015 hod dziaržaŭny doŭh Biełarusi vyras na 131,1 trłn rubloŭ, abo na 66,4%, i na 1 studzienia 2016 hoda skłaŭ 328,6 trłn rubloŭ. Pry hetym źniešni dziarždoŭh na 1 studzienia 2016 hoda skłaŭ 12,4 młrd dołaraŭ ZŠA, źmienšyŭšysia z pačatku 2015 hoda na 133,9 młn dołaraŭ, abo na 1,1%.
Limit źniešniaha dziaržaŭnaha doŭhu Biełarusi na 2016 hod ustanoŭleny ŭ 17 młrd dołaraŭ — heta praduhledžana zakonam ab biudžecie. Limit unutranaha dziaržaŭnaha doŭhu na 2016 hod ustanoŭleny ŭ 115 trłn rubloŭ.
