U Izraili pałaje skandał, źviazany z bankructvam miascovaha aliharcha Eliezera Fišmana, kiraŭnika chołdynhu Fishman Group. U svoj čas jon abiacaŭ bujnyja inviestycyi ŭ zabudovu Parku vysokich technałohij u Minsku. Adnak pabudavaŭ adzin ofisny kompleks. Plus płanavaŭ uzvodzić try žyłyja vyšynnyja damy ŭ kancy praśpiekta Pieramožcaŭ. Pieršy abjekt źbirajucca zdać u ekspłuatacyju litaralna «dniami», ale zabudoŭščyk ad Fišmana adchryščvajecca, piša Tut.by.
haaretz.com
U ciapierašni čas u Tel-Aviŭskim akruhovym sudzie iduć słuchańni pa pracedury bankructva Eliezera Fišmana. Dniami advakat Josi Bienkal pradstaviŭ sudu spravazdaču ab majomaści i abaviazkach Fišmana, u jakoj nazvaŭ spravu «najbujniejšym bankructvam ŭ historyi Izraila». Suma dakazanych daŭhoŭ biznesmiena, pa zaklučeńni Bienkala, składaje nie mienš za 4 miljardaŭ šekielaŭ, a bankructva Fishman Group moža paciahnuć na dno nie mienš za 120 kampanij u Izraili i za miažoj, piša Israelinfo.
Pavodle infarmacyi partała Ynet, havorka idzie pra kampanii, jakija ŭvachodziać u Fishman Group i zarehistravanyja na imiony členaŭ siamji biznesmiena. «Niahledziačy na toje, što svajaki Fišmana ciapier sprabujuć admaŭlać isnavańnie Fishman Group, u svoj čas jany nie tolki sami prydumali sabie hetuju nazvu, ale i zrabili ŭsio mahčymaje dla taho, kab uvieści jaje ŭ hramadskuju śviadomaść i vykarystoŭvać dla svaich patreb», — adznačyŭ advakat. U spravazdačy skazana, što na praciahu mnohich miesiacaŭ členy siamji Fišman vyvodzili aktyvy z kampanij, jakija ŭvachodziać u Fishman Group, piša Orbita.co.il.
Fishman Group pryjšła ŭ Biełaruś u 2008 hodzie i vykazała žadańnie ŭdzielničać u zabudovie Parka vysokich technałohij u Minsku. Ahulny abjom inviestycyj byŭ vyznačany ŭ sumie kala 550 młn jeŭra. Adnak z-za prasiadańnia rynku, skandałaŭ ź miascovymi biznesmienami i nieparazumieńnia z čynoŭnikami ambicyjnyja płany skaracilisia da minimumu. Byli pabudavanyja try žyłyja damy i biźnies-centr «Klevier park» płoščaj 15 tys. kv. m. Dla budaŭnictva ofisnaha budynka izrailcianie pryciahnuli kredyt na 8,7 młn jeŭra ad Jeŭrapiejskaha banka rekanstrukcyi i raźvićcia. Letam 2016 hoda Minharvykankam skasavaŭ inviestycyjnuju damovu na budaŭnictva budynkaŭ u PVT z «dačkoj» Fishman Group kampanij Svitland Development.
U ciapierašni čas u Lebiadzinym (praz pr. Pieramožcaŭ — vadaschovišča Drazdy, praz vulicu — sažałka Lebiadzinaja) Svitland uzvodzić elitny žyły kompleks D3 (DeTry). Kompleks budzie składacca z troch 25-paviarchovych 160-kvaternych damoŭ, jakija ŭzvyšajucca nad dvuchuzroŭnievym styłabatam. Pieršy dom płanavali zdać u ekspłuatacyju ŭ studzieni 2017 hoda. Ale hetaha nie adbyłosia.
— Usia situacyja vakoł sp. Eliezera Fišmana, jakaja atrymała taki rezanans u izrailskich ŚMI, nie maje nijakaha dačynieńnia da kampanii Svitland. Ź listapada 2015 hoda sp. Fišman nie źjaŭlajecca bienificyjaram našaj kampanii. Kampanija źjaŭlajecca daččynym pradpryjemstvam izrailskich publičnych kampanij, takich jak JEC i IBC (raniej jany naležali Fišmanu, ale ciapier — izrailskim fondam i pryvatnym inviestaram), — zajavili ŭ biełaruskim ofisie Svitland Development. — Hetaja historyja nie maje nijakaha dačynieńnia da terminaŭ zdačy ŭ ekspłuatacyju pieršaha doma kompleksu D3. U kancy 2016 hoda žurnalisty mahli pierakanacca, što pieršy dom kompleksu hatovy. Trymalniki ablihacyj, budučyja žychary kompleksu, mohuć [z-za izrailskaha skandału] nie turbavacca. Atrymańnie akta ŭvodu — pytańnie bližejšych dzion. Što tyčycca druhoha doma, to my płanujem jaho zdać vosieńniu 2018 hoda. Terminy budaŭnictva treciaha doma my pakul nie hatovyja anansavać.
U Svitland Development nie zmahli prakamientavać toj fakt, što źmiena akcyjanieraŭ pa časie supała z padačaj u sud zajavy banka «Leumi», jakaja zapadozryła kiraŭnictva Fishman Group ŭ vyvadzie ź jaje aktyvaŭ. «Za hety čas my vykanali ŭsie abaviazacielstvy. Heta kaža ab tym, što nas našumiełaja historyja nie kranuła», — padkreślili ŭ kampanii.
