Sprava byłoha studenta pieršaha kursa MIPSA, jaki napaŭ ź bienzapiłoj na ludziej u HC «Novaja Jeŭropa», Minski haradski sud pačnie razhladać 20 lutaha. Pra heta paviedamiła pamočnik staršyni Minharsuda Anastasija Šylvian.
Sprava budzie słuchacca ŭ adkrytym režymie.
Jak paviedamlałasia, materyjały hetaj kryminalnaj spravy ŭ Minharsud 29 śniežnia nakiravała Hienieralnaja prakuratura. «Vyvučeńnie kryminalnaj spravy pakazała, što papiaredniaje rasśledavańnie praviedziena poŭna i abjektyŭna. Dziejańni abvinavačvanaha kvalifikavanyja pravilna. Padstaŭ dla admieny abo źmieny miery strymańnia ŭ vyhladzie zaklučeńnia pad vartu nie ŭstanoŭlena», — havaryłasia ŭ paviedamleńni hałoŭnaha nahladnaha orhana krainy.
Siamnaccacihadovamu Uładzisłavu Kazakieviču vystaŭlenaje abvinavačańnie va ŭčynieńni złačynstvaŭ, praduhledžanych č. 1 art. 13 i č. 2 art. 139 KK (padrychtoŭka da zabojstva dźviuch i bolš asob), č. 1 art. 14 i č. 2 art. 139 KK (zamach na zabojstva dźviuch i bolš asob), č. 2 art. 139 KK (zabojstva, učynienaje z asablivaj žorstkaściu z chulihanskich mierkavańniaŭ), č. 1 art. 339 KK (chulihanstva).
Pavodle danych śledstva, 8 kastryčnika 2016 hoda kala 17.30 chłopiec, znachodziačysia ŭ stanie ałkaholnaha apjanieńnia, zajšoŭ u handlovy centr «Novaja Jeŭropa» z čachłom dla muzyčnaha instrumienta, zaviedzienaj i hatovaj da ŭžyvańnia bienzapiłoj. Padletak vybiraŭ abjekty dla napadu siarod rabotnikaŭ i naviedvalnikaŭ handlovaha centra. Pieršaj jon pasprabavaŭ zabić žančynu, adnak taja zmahła chutka zreahavać i ŭciačy. Druhoj žančynie 1973 hoda naradžeńnia nanios dva ŭdary bienzapiłoj. Paśla taho jak bienzapiła zahłuchła ŭ vyniku traplańnia ŭ łancuh adzieńnia paciarpiełaj, napadnik dastaŭ z čachła ad hitary siakieru-kuvałdu i nanios žančynie ŭdary, ad jakich jana pamierła na miescy zdareńnia.
Zatym abvinavačvany, praciahvajučy pieramiaščacca pa handlovym centry, pryčyniŭ cialesnyja paškodžańni roznaj stupieni ciažaru dźvium žančynam, jakim paźniej była akazanaja miedycynskaja dapamoha. Paciarpiełymi pa kryminalnaj spravie pryznanyja try žančyny i svajaki zahinułaj.
Praź niepraciahły čas napadnika zatrymali rabotniki i naviedvalniki handlovaha centra, a taksama supracoŭniki milicyi, jakija prybyli.
Padčas śledstva ŭstanoŭleny fakt padrychtoŭki abvinavačanym zabojstva dźviuch i bolš asob 7 kastryčnika 2016 hoda ŭ adnoj sa staličnych VNU. Niepaŭnahadovy, znachodziačysia ŭ stanie ałkaholnaha apjanieńnia, zajšoŭ u navučalny korpus i zavioŭ bienzapiłu. Jon źbiraŭsia zajści ź joj i siakieraj-kuvałdaj u lekcyjnuju aŭdytoryju, dzie ŭ hety čas zajmalisia 178 studentaŭ, z metaj napadu na ich. Davieści svoj namier da kanca padazrony nie zmoh, bo vypadkova kranuŭ ryčah tormazu bienzapiły, u vyniku čaho spyniŭsia łancuh. Sproby zavieści bienzapiłu apynulisia niaŭdałymi, što vymusiła jaho pakinuć terytoryju VNU.
Padčas śledstva dapytana kala 200 śviedak, praviedzienyja dziasiatki ekśpiertnych daśledavańniaŭ. Daśledavanaja asoba abvinavačanaha. Dapytanyja jaho adnakłaśniki, nastaŭniki, adnahrupniki, vykładčyki i inšyja asoby.
Zhodna z zaklučeńniem stacyjanarnaj kompleksnaj psichołaha-psichijatryčnaj ekśpiertyzy niepaŭnahadovy ŭ pieryjad inkryminavanych jamu dziejańniaŭ moh u poŭnaj miery ŭśviedamlać značeńnie svaich dziejańniaŭ i kiravać imi.
