U Mazyrskim rajonie 5 lutaha zatrymali mužčynu, jaki vydavaŭ kradzienaje parasia za sabaku. Jak paviedamiŭ BiełaPAN aficyjny pradstaŭnik UUS Homielskaha abłvykankama Vital Prystromaŭ, viečaram narad DAI Mazyrskaha RAUS patrulavaŭ viosku Prudok. Ruch byŭ małalikim, i ŭvahu supracoŭnikaŭ pryciahnuŭ mužčyna, jaki niaŭpeŭniena išoŭ pa abočynie i ciahnuŭ za saboj sanki ź miaškom.
Vjetnamskaje parasia. Ilustracyjnaje fotahrunya.ru
«Kali padarožnik paraŭniaŭsia sa słužbovym aŭtamabilem, supracoŭniki ŭbačyli pierad saboj maładoha chłopca, jaki byŭ dobra napadpitku. Dziaržaŭtainśpiektar pacikaviŭsia, jakuju pakłažu toj viazie. Surazmoŭca adkazaŭ, što ŭ miašku sabaka. «Barbos» u hety momant staŭ varušycca i rochkać. Milicyjanty padyšli da sanak, raźviazali miech, a ź jaho vysunuŭsia piatačok vjetnamskaha parasiaci. Da zatrymanaha adrazu paŭstaŭ šerah pytańniaŭ, na jakija toj tolki zmoh skazać, što žyvioła lažała na darozie, voś i vyrašyŭ uziać z saboj, kab nie zamierzła», — skazaŭ Prystromaŭ.
Dziaržaŭtainspektary zatrymali chłopca z žyvym hruzam i nakiravalisia šukać uładalnika žyvioły. Nieŭzabavie jany vyjavili, dzie žyvie haspadar parasiaci, i pajechali da jaho doma.
«45-hadovy miascovy žychar, ubačyŭšy svajo parasia, mocna ździviŭsia. Akazałasia, što jon trymaje ŭ chlavie dvuch vjetnamskich śviniej. Bujnuju asobinu złodziej nie kranuŭ, a tuju, što mienš, zmoh zapchnuć u miašok i vyvieźci na sankach. Haspadar navat nie padazravaŭ, što złamyśnik zalez da jaho ŭ haspadarčuju pabudovu», — adznačyŭ pradstaŭnik UUS.
Pa fakcie kradziažu raspačataja kryminalnaja sprava, padazravany, raniej sudzimy za kradziež, zatrymany.
