«Biełavija» ŭrehulavała z ukrainskim bokam pytańnie kampiensacyi za prymusovaje viartańnie samalota ŭ Kijeŭ. Pra heta 7 lutaha paviedamiŭ BiełaPAN hienieralny dyrektar biełaruskaj avijakampanii Anatol Husaraŭ.
«Znojdzienaje rašeńnie pryniata i realizavana. Jano całkam zadavalniaje zakanadaŭstva Ukrainy i Biełarusi. Prablema zakryta. Kampiensacyjny miechanizm znojdzieny», — zajaviŭ Husaraŭ.
Pamier kampiensacyi hiendyrektar nie nazvaŭ, adznačyŭšy, što havorka idzie pra tuju sumu, jakaja raniej vystaŭlałasia ŭkrainskamu boku. «Znojdzieny varyjant kampiensacyi našych vydatkaŭ pry palotach va Ukrainu. Nas heta ŭ poŭnaj miery zadavalniaje, — adznačyŭ Husaraŭ. — Ukrainski bok z poŭnym razumieńniem zrabiŭ hetyja kroki. Tak što tema zakryta».
Samalot «Boinh 737-800» (bartavy numar EW-456PA) avijakampanii «Biełavija», jaki vykonvaŭ rejs V2-840 pa maršrucie Žulany (Kijeŭ) — Minsk, 21 kastryčnika 2016 hoda byŭ viernuty ŭ aeraport vyletu pa patrabavańni Słužby biaśpieki Ukrainy. Na borcie znachodziłasia 136 pasažyraŭ i šeść členaŭ ekipaža. Ekipažu było zajaŭlena, što ŭ vypadku nievykanańnia kamandy ŭ pavietra budzie padniataja bajavaja avijacyja. U vyniku pravaachoŭnyja orhany Ukrainy źniali z rejsa adnaho padazronaha, na ich dumku, pasažyra, hramadzianina Armienii. Paśla pravierki jon byŭ adpuščany i palacieŭ u Biełaruś nastupnym rejsam.
Abureńnie biełaruskaha boku vyklikała pahroza pierachopu bajavoj avijacyjaj. MZS Biełarusi zajaviŭ pratest i ŭručyŭ notu Ukrainie. Biełaruski bok zapatrabavaŭ kampiensacyi ŭsich finansavych zatrat i vydatkaŭ.
Prezident Ukrainy Piatro Parašenka 10 listapada ŭ telefonnaj razmovie z Alaksandram Łukašenkam vykazaŭ prabačeńni za incydent z samalotam «Biełavija» i skazaŭ, što vinavatyja pakaranyja.
