U Brasłavie ŭ muziei tradycyjnaj kultury 4 lutaha adkryłasia vystava žyvapisnych pracaŭ z kalekcyi nastajaciela parafii Najśviaciejšaj Trojcy ŭ Drui ks. Siarhieja Surynoviča. Usie pracy — vynik druhoha Drujskaha mastackaha pleneru «Pačatki», jaki adbyŭsia letaś, piša krynica.info.
Tut i nižej fota: krynica.info
Vystavu, jakaja skłałasia z 38 prac, adkryŭ biskup Viciebski Aleh Butkievič — brasłaŭčanin pa narodžańni. Jon pryjechaŭ u rodny horad admysłova, kab pahladzieć vystavu i parazmaŭlać z supracoŭnikami muzieju i šmatlikimi hledačami pra poviaź mastactva ziamnych majstroŭ i mastactva stvareńnia Hospadam śvietu, nahadać, što dadzieny zvyš mastaku talent robić jaho sutvorcam Niabiosaŭ.
«Nie samaje hałoŭnaje — nakolki zapatrabavanyja tvory novych, maładych mastakoŭ siońnia, nakolki poŭnyja hledačami zały. Heta praca i dla naščadkaŭ, dla jakich mastaki adtvorvajuć abrazki navakolnaha śvietu, zachoŭvajučy tradycyi nacyjanalnaha mastactva», — padkreśliŭ biskup Viciebski, jaki vielmi cikavicca žyvapisam i sam maje nievialikuju kalekcyju prac, natchnionych krajavidami Brasłaŭščyny.
Paśla ŭračystaj cyrymonii muziejščyki zaprasili biskupa na čajavańnie i padaryli jamu vyšyvanuju kašulu, stvoranuju rukami majstrychi Maryi Dvorskaj, i tkany pojas pracy Natalli Parachnievič, abiedźvie jany — supracoŭnicy muzieja. Asablivuju radaść haspadaroŭ muzieja vyklikała zhoda biskupa Butkieviča adrazu prymieryć padarunak.
