Cikava čytać apošnim časam dyskusii na temu: ci varta ŭ vypadku čaho iści zmahacca za Łukašenku suprać Rasiei? I čym bližejšy padajecca hety «vypadak čaho», tym cikaviej.
Z adnaho boku — dyktatar, jaki ŭsimi siłami źniščaŭ inšadumstva i inšadumcaŭ, źmianiŭ nacyjanalnyja simvały, zahnaŭ movu «pad nary», davioŭ ekanomiku da trahikamičnaha stanu, a zaraz jašče i dekret pra «darmajedaŭ» padsunuŭ. Ź inšaha — daskanałaja mašyna pa vyniščeńni jak svajho narodu, tak i narodaŭ na akupavanych terytoryjach, jakaja pradukuje nizkajakasnuju kulturu dy absurdnyja zakony, «impieryja zła». Nu i vybar, vorahu nie pažadaješ.
Ale ŭsio ž taki, kali Rasieja ŭvojdzie ŭ surjozny kanflikt z Łukašenkam, što rabić? Naprykład, kali našaha hałoŭnakamandujučaha ŭsio ž taki nie zastrelać, nie atruciać, nie vykraduć chłopcy ź leninhradskim akcentam, i jon taki zdoleje pramović «Vstavaj, stranaohromnaja…» pa radyjo ŭ hadzinu Ch, kudy iści patryjotam? U vajenkamat, u les ci na vakzał z čamadanami?
Mnie asabista naš hałoŭnakamandujučy zusim nie simpatyčny: ruskamoŭny, papulist… A hienierały z rasiejskimi proźviščami, zvyčkami dy mientalnaściu, jakimi jon siabie atačyŭ — jašče mienš simpatyčnyja.
Ale ci šmat ad jaho adroźnivaŭsia ruskamoŭny papulist Stanisłaŭ Bułak-Bałachovič, jakoha my śmieła zapisvajem u hieroi?
Ci bolšymi biełaruskimi patryjotami byli jahonyja «załatapahonnyja» hienierały z rasiejskimi proźviščami, zvyčkami dy mientalnaściu?
Na kožny čas — svoj lidar, svoj «Bałachovič». I zusim nieabaviazkova jon maje ŭsim nam padabacca.
Karol Francyi, za jakoha vajavała Žanna d'Ark, chutčej za ŭsio joj nie padabaŭsia.
Siońnia my pamiatajem jaje, a voś jahonaje imia nazavie daloka nie kožny.
Prezident Ukrainy, za jakoha zaraz vajujuć bajcy ATA, chutčej za ŭsio im nie padabajecca.
Praz sto hadoŭ ich buduć pamiatać, a jahonaje imia dy proźvišča zabuduć. Ale sens u tym, što i Žanna, i bajcy ATA vajavali nie za svaich lidaraŭ, a za svaju Radzimu.
Viartajučysia da Bałachoviča, varta ŭzhadać situacyju sa Słuckim Zbrojnym Čynam. Chaj mianie papraviać historyki, ale situacyja, daj Boh pamiaci, była nastupnaja: «baćka-ataman» prapanavaŭ słuččakam razam zmahacca z balšavikami, ale tyja pastavili pad sumnieŭ jahonyja matyvacyi dy maralnyja jakaści, tamu admovilisia i hieraična «pajšli pamirać, kab žyła Baćkaŭščyna».
Kaniečnie, za Baćkaŭščynu varta pamirać, ale značna lepš za Baćkaŭščynu pieramahać. I ŭ sajuzie z Bałachovičam, jaki mieŭ zbroju, ludziej dy resursy, heta atrymałasia b značna lepš.
Što stałasia b u vypadku pieramohi Stanisłava Nikadzimaviča? Nieviadoma, ale vielmi vierahodna, što ŭ Biełarusi na niejki čas ustalavałasia b aŭtarytarnaja kłanavaja maładaja dziaržava z byłymi biełahvardziejcami na klučavych pastach i charyzmatyčnym lidaram na čale. Ničoha nie nahadvaje? Nikoha nie paznajecie?.. Razam z tym, Biełaruś była b niezaležnaj i pastupova prajšła b peŭnyja etapy rostu, navat u vypadku dalejšaj straty niezaležnaści, jak heta było ŭ vypadku z maładoj Litvoj ci Łatvijaj u 1940-m.
Sens u tym, što niezaležnaja Biełaruś pieravaryła b Bałachoviča, jak pieravarvali svaich bałachovičaŭ inšyja narody. Pieravaryć i Łukašenku, ale tolki ŭ vypadku, kali zastaniecca niezaležnaj. Vielmi trapna situacyju acharaktaryzavaŭ niadaŭna znajomy chłopiec, były čalec adnoj, zabytaj ŚMI i Fejsbukam, pravaj hrupoŭki:
«Łukašenka ciapier naš apanient va ŭnutranaj palitycy, ale sajuźnik u vonkavaj».
Usio hienijalnaje — prosta. Nam nie padabajecca, naprykład, Dekret №3, ale jašče mienš nam padabajecca Rasieja, jakaja ŭ vypadku pieramohi tut prymie dziesiać takich dekretaŭ, a tych, chto vystupić suprać, budzie vyvozić nie na Akreścina, a ŭ lesapałasu.
Važny momant: krytykavać Łukašenku i śmiajacca ź jahonych pierłaŭ u efiry majem prava my, biełarusy, heta naša prerahatyva. Kali toje samaje zaraz robiać našy susiedzi z uschodu — heta razdražniaje.
My ŭžo tut jak-niebudź sami raźbiaremsia, a vy, chłopcy, sa svajmi murzikami spačatku dajcie rady. A jon — naš, i nam samim jaho pieravarvać, biez vašych cudoŭnych tabletak.
Siabry, rassłabciesia, nijakaha vybaru pamiž Łukašenkam i Rasiejaj nasamreč niama. Jość vybar pamiž Biełaruśsiu i Rasiejaj, jak dla Žanny byŭ vybar pamiž Francyjaj i Anhlijaj, dla bajcoŭ ATA — pamiž Ukrainaj i RF.
Naahuł, mienš dumajcie pra našaha hałoŭnakamandujučaha: jaho proźvišča nie maje anijakaha značeńnia. Značeńnie maje vajskovy bilet u nahrudnaj kišeni dy mahnicik z Bałachovičam na vašaj pustoj ladoŭni.
