Na Tuzin.fm vykładzienaja składanka piesień haradzienskaha vykanaŭcy, jakija nie publikavalisia dahetul.
U internet-składanku ŭvajšli jak zusim novyja pieśni, tak i daŭnija tvory, jakija taksama mała chto čuŭ. Tut havorka najpierš pra «Stryt-bluz», svajeasablivaje pryśviačeńnie Miensku. Jana napisanaja roŭna 25 hadoŭ tamu.
Dalej padajem kamentary, jakija Viktar Šałkievič zrabiŭ admysłova dla naviednikaŭ Tuzin.fm da kožnaj prezentavanaj pieśni.
«Pieśnia pra miesta Mahiloŭ».
«Chto nia viedaje Mahiloŭ — toj nia viedaje ničoha ŭ žyćci. Heta byŭ druhi horad u Vialikim Kniastvie paśla Vilni pa kolkaści kirmašoŭ, jarmarak. Jość tam charošy chłopiec Dzianis Vasilko, jon mianie vadziŭ pa starym Mahilovie, pakazaŭ dzie stajała Alejnaja brama. I ja padumaŭ, što varta napisać pra hety horad pieśniu. U kožnym vartym uvahi miescy pavinien być prynamsi adzin zaciaty amatar žanočaj pryhažości i adzin hłyboka vierujučy Izraelit. U Mahilovie heta Valeryk i Symon — proźviščy viadomyja tolki niekatorym i nie dla ŭsich!»
«Stancyja Alachnovičy»
«Niejak apynuŭsia na hetaj stancyi pamiž Mienskam i Maładečnam. Była ciopłaja letniaja noč. Pachła ŭsio, viedajecie, jak heta ŭ nas byvaje pry kancy viasny, na pačatku leta. Ale tut pačalisia zdareńni, jakija čaplalisia adno za adno. A dalej — usio, jak u pieśni».
«Bluz Vialiki Kastryčnik»
«Ci pisali vy ŭ škole sačynieńni na temu: «Kali b ja sustreŭsia ź Leninym»? Nie? A ja pisaŭ. I hieroj hetaj pieśni pisaŭ. Heta versija padziejaŭ u Pietrahradzie, praśpiavanaja maładym baćkam svajoj dačce».
«Ahurki i pamidory»
«Paety eksperymentujuć z kolerami! Duboŭka, naprykład, pisaŭ pra šypšynu — zialony list, čyrvony ćviet! I ja taksama zachacieŭ: pamidory — čyrvonyja, ahurki — zialonyja! Razumiejcie jak chočacie».
«Kala Čarhovaha kaścioła»
«Parodyja na ślaźliva-sentymentalna-liryčna-patryjatyčnuju tvorčaść pisacielej i paetav savremiennaści! Źjaviłasia jana, kali ja pačuŭ dysk polskaha choru ź Miensku: paśla sapraŭdy klasnych rečaŭ, jany vyrašyli aznačyć svajo pachodžańnie: zahučali draŭlanyja cymbały, harmonik, žałosnaje-sirockaje śpiavańnie… Vy ŭsie paznajecie hetuju pieśniu. U joj raspaviadajecca historyja žančyny, jakaja była ŭsim, a stała nikim».
«Maja kachanaja, što ŭ lesie žyvie»
«Heta ŭlubionaja pieśnia majho hitarysta i kalehi — Jury Chiłaŭca. Ja jaje taksama vielmi lublu».
«Sakułka-Biełastok»
«Na biełastockim bazary ŭ 90-ch stajali ŭsie haradzienskija — ad doktara navuk da vychavaciela dziciačaha sadku. Heta pieśnia starych biznesmenaŭ, jakija pačynali z papiarosaŭ i harełki, a skončyli, dziakuj Bohu, nie na Akreścina, a Havajami. Miłyja ŭspaminy pra maładości…»
Pieśni zapisanyja padčas kancertu Viktara Šałkieviča ŭ mienskim Teatry estrady 29 kastryčnika 2016 hodu. Hukarežyser — Usievaład Hrodnikaŭ. Najbližejšy kancert vykanaŭcy projdzie 12 lutaha ŭ małoj zali KZ «Miensk».
Nieŭzabavie Viktar Šałkievič prezentuje i studyjny albom. Praca nad im viadziecca na studyi Viačasłava Bankieviča ŭ Baranavičach.
12 lutaha a 19.00 u małoj zale k/z «Minsk» (Kastryčnickaja, 5) viadomy bard, akcior i šansańje Viktar Šałkievič vystupić z prahramaj najlepšych piesień dla usich zakachanych i nie tolki. Usim zakachanym param — kampakt-dysk u padarunak!
Kvitki ad 12,5 da 22,5 rubloŭ. Daviedki pa telefonach: 8 044 5517706, 8 029 8517706
