Daččynaje pradpryjemstva dziaržaŭnaj «Biełarusnafty» Beloil Polska zaklučyła ździełku z Nacyjanalnaj iranskaj naftavaj kampanijaj (NIOC) ab pastaŭcy 600 tysiač baralaŭ nafty z adhruzkaj ŭ lutym, paviedamiła pres-słužba iranskaj kampanii.
«Heta pieršaja zakupka iranskaj nafty (Biełaruśsiu) paśla źniaćcia z Tehierana mižnarodnych sankcyj letaś», — adznačyli ŭ NIOC.
Jak čakajecca, Beloil Polska transpartuje hetuju partyju nafty ŭ port Adesy (Ukraina) abo Vientśpiłsa (Łatvija), a zatym dastavić jaje ŭ Biełaruś pa čyhuncy. «Ab łahistycy jašče treba budzie damovicca», — udakładniajecca ŭ pres-relizie.
Paviedamleńnie pra pačatak kupli Biełaruśsiu iranskaj nafty pieršym raspaŭsiudziła 16 lutaha infarmahienctva Reuters sa spasyłkaj na kampietentnyja krynicy. Paviedamlałasia, što nafta ab`iomam 80 tysiač ton (pryblizna 600 tysiač baralaŭ) moža być adhružanaja 20 lutaha.
U pres-słužbie biełaruskaha ŭrada i kancernie «Biełnaftachim» BiełaPAN nie paćvierdzili, ale i nie abvierhli hetuju infarmacyju. Pry hetym u «Biełnaftachimie» adznačyli, što «kancern praciahvaje pracu pa dyviersifikacyi pastavak nafty na biełaruskija NPZ».
U studzieni Alaksandr Łukašenka daručyŭ uradu šukać alternatyŭnyja varyjanty pastavak u krainu nafty. «My damaŭlalisia, što najbližejšym časam vy mianie prainfarmujecie pra situacyju ŭ naftahazavym kompleksie krainy, asabliva ŭ suviazi z pavodzinami Rasii. Zhodna z našymi damoŭlenaściam i pahadnieńniami, raniej zaklučanymi, jakaja ŭ nas situacyja? My ničoha nie ŭtojvajem ad ludziej. Utojvać, ja dumaju, nie treba. Katastrofy niama, ale skaračeńnie pastavak nafty ad Rasijskaj Fiederacyi pavinna być zamieščanaje alternatyŭnymi varyjantami», — zajaviŭ kiraŭnik dziaržavy 20 studzienia, prymajučy z dakładam vice-prem`iera Uładzimira Siamaški.
Łukašenka nahadaŭ, što adpaviednyja pytańni abmiarkoŭvalisia jašče ŭ kancy minułaha hoda. «I my hetyja alternatyŭnyja varyjanty nie prosta prapracoŭvali — my niekatoryja vyprabavali, vyprabavali ŭžo na praktycy, dastaŭlajučy naftu z Čornaha i Mižziemnaha moraŭ na našy naftapierapracoŭčyja zavody, kab na praktycy pahladzieć, jak heta budzie vyhladać ekanamična», — skazaŭ jon.
Biełaruś i Rasija na praciahu hoda nie mohuć urehulavać naftahazavuju sprečku — pytańni koštu rasijskaha hazu i zahruzki syravinaj biełaruskich naftapierapracoŭčych zavodaŭ. Z 2016 hoda Rasija, zhodna z damoŭlenaściami, pavinna była pastaŭlać u Biełaruś štohod 24 młn ton nafty až da 2024 hoda. Adnak z druhoha paŭhodździa pastaŭki byli skaročanyja ŭ suviazi z zapazyčanaściu Minska za rasijski haz. U pačatku hetaha hoda rasijskija ŚMI paviedamili, što ŭ pieršym kvartale Rasija źbirajecca skaracić pastaŭki nafty ŭ Biełaruś z 4,5 da 4 młn ton.
