U Rymska-katalickim Kaściole 1 sakavika adznačajecca Papialcovaja sierada (Papialec) — pieršy dzień Vialikaha postu. Vialiki post źjaŭlajecca pieryjadam supolnaha pakajańnia.
Hety čas «praz napamin ab chroście ci praz padrychtoŭku da jaho, a taksama praz pakajańnie pavinien nastroić viernikaŭ na śviatkavańnie Paschalnaj tajamnicy dziakujučy bolš uvažlivamu słuchańniu Božaha słova i starannaj malitvie».
Pakajańnie vyražajecca ŭ šmatlikich formach, najpierš — praz post, malitvu, miłaścinu. Zhodna z kaściolnaj zapaviedździu, u pieryjad Vialikaha postu nieabchodna ŭstrymlivacca ad udziełu ŭ zabavach.
Ustrymańnie ad miasa abaviazkovaje va ŭsie piatnicy Vialikaha postu i ŭsiaho kalandarnaha hoda, kali na ich nie prypadaje liturhičnaja ŭračystaść. Takoje ŭstrymańnie abaviazkovaje dla viernikaŭ, jakija dasiahnuli 14-hadovaha ŭzrostu. Abaviazak ustrymańnia ad miasa nie datyčyć spažyvańnia jajek, małočnych praduktaŭ i dadatkaŭ z žyviolnaha tłušču da stravaŭ.
U Papialcovuju sieradu i Vialikuju piatnicu dla viernikaŭ pradpisana nie tolki ŭstrymańnie ad miasa, ale i post (ścisły post), jaki zaklučajecca ŭ abmiežavańni kolkaści spažyvanaj ježy. Pry takim posnym abmiežavańni dapuskajecca adzin raz najeścisia dasyta, nie zabaraniajecca spažyć nievialikuju kolkaść ježy ranicaj abo ŭviečary. Taki post abaviazvaje viernikaŭ ad 18 da 60 hadoŭ žyćcia.
Nie źjaŭlajecca hrachom niezachavańnie postu i ŭstrymańnia ad miasa, kali niama mahčymaści ŭčynić heta pa abjektyŭnych pryčynach. U niekatorych miascovaściach, pa zvyčai, pryniata zachoŭvać taksama post u Vialikuju subotu.
Probašč parafii, pa spraviadlivaj pryčynie i zhodna z pradpisańniami dyjacezijalnaha biskupa, u paasobnych vypadkach moža ŭdzialić dyśpiensu (vyzvalić ad abaviazku) adnosna zachavańnia pakajannaha dnia abo zamianić hety abaviazak na inšyja pabožnyja ŭčynki.
Vierniki mohuć dabravolna nakłaści na siabie inšyja abmiežavańni ŭ ježy abo vybrać inšyja dadatkovyja formy pakajańnia.
Vialiki post zakančvajecca pierad Imšoj Viačery Pana ŭ Vialiki Čaćvier. Imšoju Viačery Pana pačynajecca Paschalny Tryduum.
