Izrailskija pravaachoŭnyja orhany aryštavali emihranta ź Biełarusi, jaki padazrajecca ŭ sprobie dałučycca da terarystyčnaj arhanizacyi «Isłamskaja dziaržava» i źjechać vajavać u Siryju, paviedamlaje ria.ru sa ssłykoj na Ahulnuju słužbu biaśpieki (ŠABAK).
Pavodle jaje danych, 40-hadovy baćka piaciarych dziaciej Valancin Mazaleŭski pryniaŭ isłam praź niekalki hadoŭ paśla pierajezdu na pastajannaje miesca žycharstva ŭ Izrail. Jon byŭ aktyŭnym udzielnikam internet-supolnaści prychilnikaŭ ID i kupiŭ bilet u Turcyju, kab pierajści miažu i dałučycca da bajevikoŭ, śćviardžaje antyterarystyčnaja śpiecsłužba.
«Ahulnaja słužba biaśpieki sumiesna z palicyjaj Izraila 7 lutaha 2017 hoda aryštavała Valancina Mazaleŭskaha, 1977 hod naradžeńnia, hramadzianina Izraila, jaki pražyvaje ŭ nasielenym punkcie Šybli, žanataha baćki piaciarych dziaciej, na padstavie raźviedvalnaj infarmacyi, zhodna ź jakoj jon niadaŭna sprabavaŭ pajechać u Siryju, kab uziać udzieł u bajavych dziejańniach u jakaści člena «Isłamskaj dziaržavy», — havorycca ŭ paviedamleńni.
Infarmacyja ab spravie była dazvolenaja da publikacyi paśla taho, jak Mazaleŭskamu vystavili abvinavačvańni ŭ sudzie.
U Izraili ID abjaŭlenaja pa-za zakonam, za suviazi ź joj praduhledžanaje kryminalnaje pakarańnie. Ułady krainy raniej pahražali pazbaŭlać hramadzianstva suajčyńnikaŭ, jakija źjazdžajuć za miažu, kab dałučycca da hrupoŭki. Bolšaść ź ich składajuć pradstaŭniki arabskaj mienšaści.