Heta adbyłosia padčas pieršaha dnia vizitacyi ijerarcha ŭ hiermanavickuju parafiju ŭ subotu, 4 sakavika.
Spadarynia Ada paznajomiła viciebskaha ardynaryja sa svajoj kalekcyjaj, raspaviała pra historyju jaje stvareńnia. Karciny ŭ halerei znachodzicca ŭ niekalkich pakojach, jany padzielenyja na asobnyja ekspazicyi. Adna ź ich pryśviečana jaje synu Michasiu Rajčonku, jaki zaŭčasna pajšoŭ z žyćcia ŭ 1999 hodzie. Było tady Michasiu tolki dvaccać šeść hadoŭ, u jaho było šmat tvorčych zadumak. Tady ž Ada Eljeŭna dała słova, što pradoŭžyć spravu svajho syna. I słova heta strymała.
U kalekcyi Ady Rajčonak jość karciny, pryśviečanyja Chałakostu, Vasilu Bykavu i jaho małoj radzimie — vioscy Byčki, Ryhoru Baradulinu, Emilii Plater, Kastusiu Kalinoŭskamu, Uładzimiru Karatkieviču, inšym znakamitym asobam. Adnu z ekspazicyj składajuć tvory mastaka Uładzimira Kandrusieviča.
Taksama asobnaja ekspazicyja pryśviečanaja našym chramam. Praŭda, pryznajecca Ada Rajčonak, mastaki nie vielmi lubiać pisać pravasłaŭnyja śviatyni. I sprava tut nie ŭ niejkaj relihijnaj nietalerantnaści, a ŭ tym, što bolšaść našych pravasłaŭnych chramaŭ pradstaŭlena tak zvanymi «muraŭjoŭkami», cerkvami, što budavalisia paśla parazy paŭstańnia pad kiraŭnictvam Kastusia Kalinoŭskaha. Tady pa zahadzie rasijskaha hienierał-hubiernatara Michaiła Muraŭjova, viadomaha jak Viešalnik, na našych ziemlach budavalisia cerkvy pa adzinamu prajektu, jaki pradstaŭlaŭ čužuju dla našych ziamiel architekturu.
Naprykancy biskup Aleh Butkievič pakinuŭ zapis u knizie hanarovych haściej i padziakavaŭ Adzie Eljeŭnie za cikavy raspovied pra svaju halereju.
