U Biełarusi ŭ vychadnyja budzie vietrana, daždžliva i chaładnavata, paviedamiła BIEŁTA namieśnik načalnika słužby mietearałahičnych prahnozaŭ Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Minpryrody Śviatłana Rybakova.
fota Julii Balcevič
«Viasna sioleta rańniaja. Tempieraturny režym amal na miesiac apiaredžvaje kalandar. Siaredniaja tempieratura pavietra za pieršuju pałavinu sakavika skłała ad plus 2 hradusaŭ na paŭnočnym zachadzie da 6 ciapła na paŭdniovym uschodzie respubliki i była na 6-9 hradusaŭ vyšejšaj za normu dla hetaha času, — adznačyła Śviatłana Rybakova. — Śniežnaje pokryva sajšło, ale na vadajomach jašče zachoŭvajecca ledastaŭ z pratalinami i zakrainami, z-za ciopłaha nadvorja aktyŭna razburajecca ledzianoje pokryva. Vychodzić na lod nielha, tamu što jon nietryvały i rychły».
U piatnicu, 17 sakavika, nočču ŭ niekatorych rajonach čakajecca tuman, mahčymy słaby hałalod. Tempieratura pavietra nočču składzie ad minus 4 da plus 2, dniom pavietra prahrejecca da 5-11 hradusaŭ.
«U hetyja vychadnyja charaktar nadvorja znoŭ pahoršycca, nieba zaciahnie vobłakami, buduć apadki, uzmocnicca viecier, a tempieraturny fon panizicca. 18-19 sakavika terytoryja Biełarusi budzie znachodzicca pad upłyvam atmaśfiernych frantoŭ, što źmiaščajucca z paŭnočnaha zachadu Jeŭropy», — skazała Śviatłana Rybakova.
U subotu, 18 sakavika, čakajecca ŭ asnoŭnym vobłačnaje nadvorje. Na bolšaj častcy terytoryi projduć apadki ŭ vyhladzie daždžu i mokraha śniehu. Nočču i ranicaj u niekatorych rajonach mocnyja apadki, mahčymy słaby hałalod i na asobnych učastkach daroh hałalodzica. Tempieratura pavietra nočču składzie ad 2 marozu da 3 ciapła. Dniom pavietra prahrejecca maksimum da 8 hradusaŭ.
U niadzielu, 19 sakavika, na bolšaj častcy terytoryi prahnazujucca karotkačasovyja apadki (mokry śnieh, doždž). Nočču i ranicaj słaby hałalod, na asobnych učastkach daroh hałalodzica. Tempieratura pavietra nočču budzie ad minus 3 da plus 2, dniom — 1-6 ciapła.
«U pačatku tydnia atmaśfiernyja franty, što źmiaščajucca z Zachodniaj Jeŭropy, abumoviać niaŭstojlivy charaktar nadvorja», — kanstatavała Śviatłana Rybakova.
U paniadziełak, 20 sakavika, nočču pieravažna va ŭschodnich i zachodnich rajonach, dniom na bolšaj častcy terytoryi respubliki projduć karotkačasovyja apadki (mokry śnieh, doždž). Tempieratura pavietra nočču składzie minus 4 - plus 2 hradusy, pry jasnym niebie tempieratura pavietra moža panižacca da minus 6. Dniom budzie 1-7 ciapła, pa paŭdniovym zachadzie tempieratura pavysicca da plus 9 hradusaŭ.
Na bolšaj častcy terytoryi ŭ aŭtorak projduć karotkačasovyja daždžy, nočču i ranicaj pa paŭnočnym uschodzie mahčymy mokry śnieh. Tempieratura pavietra nočču ad 2 marozu da 5 ciapła. Dniom čakajecca 3-10 vyšej za nul, pa paŭdniovym zachadzie pavietra prahrejecca da plus 12.
«Da siaredziny nastupnaha tydnia z rostam atmaśfiernaha cisku i pastupleńniem ciopłych pavietranych mas z paŭdniovych šyrot nadvorje palepšycca i znoŭ paciapleje», — skazała Śviatłana Rybakova.
U sieradu, 22 sakavika, budzie pieravažna biez apadkaŭ, tolki dniom u paŭnočna-zachodnich rajonach mahčymy karotkačasovyja daždžy. Nočču i ranicaj słaby tuman. Tempieratura pavietra nočču składzie ad minus 4 da plus 3. Dniom budzie 6-13 ciapła, pa poŭdni - da plus 15 hradusaŭ.
