Kiraŭnictva Eŭraźviazu na znak palityčnaha pratestu zajaviła pra niaŭdzieł eŭrapiejskich krainaŭ u mižnarodnaj kanferencyi Interpołu, jakaja musić adbycca 17–18 traŭnia ŭ Miensku. Aficyjnyja biełaruskija krynicy dahetul nie nazyvajuć kolkaści ŭdzielnikaŭ kanferencyi.
Sa skandału pačynajecca eŭrapiejskaja rehijanalnaja kanferencyja Interpołu, jakaja musić adbycca 17–18 traŭnia ŭ Miensku. Siabrami Interpołu źjaŭlajucca 46 eŭrapiejskich krainaŭ. Planavałasia, što bolšaść ź ich pryšle svaje delehacyi ŭ Miensk. Ale napiaredadni, jak paviedamiła ahienctva Rejtar, aficyjny pradstaŭnik Eŭraźviazu zajaviŭ pra niaŭdzieł eŭrapiejskich delehacyj u kanferencyi. Taki krok byŭ patłumačany palityčnymi pryčynami. Eŭraźviaz nastojvaŭ na pieranosie kanferencyi ŭ inšuju krainu. Ciapier abvieščana, što ŭ Miensk nie pryjeduć i čatyry vice-prezydenty Interpołu ad Eŭropy.
Načalnik biełaruskaha biuro Interpołu Michaił Starykovič z hetaj nahody zajaviŭ:
(Starykovič: ) «Heta ichnaje rašeńnie, ichnaja asabistaja sprava. Nijakim čynam hetyja rašeńni nie ŭpłyvajuć na našy dačynieńni – jak palicejskich abjadnańniaŭ».
Michaił Starykovič taksama paviedamiŭ, što kanferencyja 17–18 traŭnia adbudziecca, na joj planujuć abmierkavać aktualnyja prablemy ŭzajemadziejańnia j, pamiž inšaha, temu sumiesnaj baraćby z teraryzmam. Načalnik Biuro, adnak, nie nazvaŭ dakładnaj kolkaści ŭdzielnikaŭ kanferencyi j tyja krainy, što nie pryniali zaprašeńnia biełaruskaha boku.
(Starykovič: ) «Rehistracyja ŭdzielnikaŭ u nas adbudziecca zaŭtra, i zaŭtra, kali vaš karespandent akredytujecca, vy na presavaj kanferencyi zmožacie zadać heta pytańnie».
Raniej aficyjna svoj udzieł u mienskaj kanferencyi Interpołu paćvierdzili niekatoryja krainy SND – Azerbajdžan, Armenija j Rasieja, a taksama krainy z Uschodniaj Eŭropy – Baŭharyja, Serbija j Čarnahoryja, Makiedonija, Turcyja. Z Zachodniaj Eŭropy pryjeduć pradstaŭniki dziaržaŭ, jakija nie ŭvachodziać ŭ Eŭraźviaz, – Iślandyja j Švejcaryja. Niekatoryja krainy Azii, Afryki j Ameryki vykazali namier dasłać svaje delehacyi ŭ jakaści naziralnikaŭ. Da siaredziny dnia 16 traŭnia ŭ Ministerstvie ŭnutranych spraŭ nie paviedamlali, delehacyi jakich krainaŭ prybyli ŭ Biełaruś užo siońnia.
Biełaruś ustupiła u Interpoł u siaredzinie 1990 hadoŭ. Praź Interpoł było znojdziena j departavana ŭ Biełaruś niamała biełaruskich kryminalnikaŭ. Prykładam, dva hady tamu z Polščy departavali kryminalnaha aŭtaryteta Dzioŭkša, źvinavačanaha za zabojstva. Taksama ŭdzieł u Interpole byŭ skarystany padčas raśśledavańnia šerahu hučnych spraŭ.
Hetak, pavodle biełaruskich krynicaŭ, abviaščalisia ŭ vyšuk praź Interpoł kiraŭnica Nacyjanalnaha banku Biełarusi Tamara Vińnikava, viadomy pradprymalnik Alaksandar Pupiejka, namieśnik dyrektara MAZu Alaksandar Jakaŭleŭ. Miž tym, palicyi krainaŭ Eŭropy, dzie žyvuć hetyja asoby, admaŭlajucca vykonvać patrabavańni biełaruskaha boku ab ich zatrymańni j vydačy, spasyłajučysia na adsutnaść adpaviednych pahadnieńniaŭ.
