Uviečary 24 sakavika ŭ Słucku ludzi ŭ cyvilnym zatrymali kaardynatara Ruchu «Za svabodu» pa Minskaj vobłaści Vitala Amialkoviča.
Pra heta internet-haziecie «Salidarnaść» paviedamiła vidavočca zatrymańnia:
— My vypadkova sustrelisia ŭ kramie «Biełmarkiet». Vital mnie skazaŭ, što za im sočać. Ja adkazała: u ciabie paranoja! A praź niekalki chvilin jaho ŭziali na vychadzie z kramy. Da jaho padyšli dvoje mužčyn u cyvilnym, pakazali paśviedčańni, skazali, što zatrymlivajuć pa padazreńni ŭ ździajśnieńni złačynstva. Uziali pad ruki i pavieźli na niejkim čornym aŭtamabili.
Pavodle jaje słovaŭ, Vital Amialkovič 25 sakavika źbiraŭsia jechać u Minsk na Dzień Voli.
Paśla zatrymańnia doma ŭ Amialkoviča praviali pieratrus: zabrali noŭtbuk, telefon, sistemny błok, płakat «Słucki zbrojny čyn», vyjavy ź Milinkievičam i «Biełsat nie BT».
Pa najaŭnaj infarmacyi, aktyvista abvinavačvajuć u zakliku da ŭdziełu ŭ masavych mierapryjemstvach, raspaŭsiudžanaha ŭ sacsietkach. Vital znachodzicca ŭ Słuckim RAUS.
«Z pryčyny Amialkoviča», jak patłumačyła milicyja svajakam u telefanavańni na 102, zatrymana Julija Bałakir. Žančynu spyniła DAI, kali jana viartałasia dadomu z pracy (pracuje taksistkaj). Inśpiektary, nie nazvaŭšy pryčyny zatrymańnia, zahadali prajechać za imi.
Dzianis Bałakir, muž Julii, pajechaŭ u Słucki RAUS daviedacca, što z žonkaj. Apoŭnačy ź im tam praviali prafiłaktyčnuju hutarku «ab niedapuščalnaści ŭdziełu ŭ masavych mierapryjemstvach». Taksama supracoŭniki milicyi paviedamili, što mašynu taksi, na jakoj jeździć Julija, praviarajuć - ci nie znachodzicca jana ŭ uhonie.
