U Ńju-Jorku pamior amierykanski aktyvist Hiłbiert Bejkier, jaki prydumaŭ simvał ŁHBT-ruchu — viasiołkavy ściah. Jamu było 65 hadoŭ, piša VVS.
Getty
U 1978 hodzie Hiłbiert Bejkier raspracavaŭ simvał ŁHBT-ruchu - ściah, jaki pieršapačatkova składaŭsia z vaśmi padoŭžnych pałos roznych koleraŭ.
Ružovy koler simvalizavaŭ seksualnaść, čyrvony — žyćcio, aranžavy — vylačeńnie, žoŭty — soniečnaje śviatło, zialony — pryrodu, biruzovy — mastactva, indyha — harmoniju, fijaletavy — čałaviečy duch.
Paśla kolkaść pałos skaraciłasia da šaści, prybrali ružovy i indyha, a biruzovy zamianili na sini.
Bejkier tłumačyŭ, što hetym simvałam jon chacieŭ danieści da ludziej dumku ab tym, što ludzi mohuć być roznymi, ale razam jany — adzinaje cełaje.
U 2015 hodzie viasiołkavy ściah, stvorany Bejkieram, nabyŭ ńju-jorkski muziej sučasnaha mastactva. U intervju muzieju Bejkier raspavioŭ, jak da jaho pryjšła ideja stvaryć simvał ŁHBT-ruchu.
«Nam treba było niešta pryhožaje, niešta naša, — skazaŭ Bejkier. — Viasiołka vydatna padychodzić, tamu što jana adlustroŭvaje našu raznastajnaść z punktu hledžańnia rasy, połu, uzrostu i hetak dalej».
Hiłbiert Bejkier naradziŭsia ŭ Kanzasie ŭ 1951 hodzie. U pačatku 70-ch hadoŭ, kali ŭ Amierycy zaradžaŭsia ruch za pravy hiejaŭ, jon žyŭ u San-Francyska.
Bejkier udzielničaŭ u demanstracyjach ŁHBT-ruchu i rabiŭ płakaty dla mitynhaŭ, u tym liku pa prośbie Charvi Miłka — pieršaha palityka, jaki adkryta pryznaŭ svaju homaseksualnaść.
