Babrujski harvykankam dazvoliŭ pravieści 9 krasavika mitynh za pravy i svabody hramadzian. Zajaŭku na jaho padavała kiraŭnica supołki prafsajuzu REP Halina Śmirnova 24 sakavika, pierad svaim druhim sudom za arhanizacyju papiarednich mitynhaŭ, a kankretna — za pierapost u «Adnaklaśnikach» infarmacyi pra toje što 12 sakavika musić adbycca mitynh.
Mitynh 9 krasavika maje adbycca na terytoryi stadyjonu fabryki «Słavianka». Praz tapahrafičnyja asablivaści Babrujsku heta adnačasova i niedaloka ad centru, i praktyčna kraj horadu, dalej tolki krepaść. Stadyjon źjaŭlajecca aficyjna adviedzienym uładami miescam dla pikietaŭ ci mitynhaŭ, i Halina Śmirnova ŭ zajavie adrazu paznačyła jaho.
— Ja ž užo bačyła, da čaho idzie, — tłumačyć Śmirnova, — u horadzie ŭžo ničoha nie dazvalali. Kab i pratestavy nastroj ludziej padtrymać, i biez achviaraŭ abyścisia, zaviedama pahadziłasia na aficyjna adviedzienaje miesca. Ale j na mitynhu i dalej my budziem patrabavać nia tolki admieny «darmajedzkaha» dekretu, kantraktnaj systemy, spynieńnia pieraśledu palityčnych apanentaŭ, ale j prava pravodzić mitynhi ŭ bolš zručnych i bačnych miescach. Płošču Pieramohi ja, naprykład, liču idealnym miescam. Ale jany, napeŭna, bajacca, što my tank zhonim.
