Daččynaja kampanija rasijskaha «Hazproma» — «Hazprom transhaz Biełaruś» — zafiksavała ŭ 2016 hodzie čystuju stratu i maje namier skarektavać šerah zatratnych artykułaŭ na bližejšyja 2—3 hady. Pra heta TUT.BY raspaviali niekalki infarmavanych krynic.
Jak vynikaje sa spravazdač «Hazprom transhaz Biełaruś» za 2016 hod, kampanija zafiksavała čystuju stratu ŭ pamiery 440,1 młn rub. Hodam raniej pradpryjemstva pakazała prybytak u pamiery 492,4 młn rub. U paviedamleńni taksama havorycca, što karotkaterminovaja debitorskaja zapazyčanaść pavialičyłasia za minuły hod z 437,5 młn da 866 młn rub.
Biełaruskaja «dačka» «Hazproma» stała zakładnikam sprečki pamiž Minskam i Maskvoj u pytańniach cany na haz.
Ułady Biełarusi nastojvali na źnižeńni cany z 132 dalaraŭ da 73 dalaraŭ za 1 tysiaču kubamietraŭ hazu, a biełaruskija abłhazy apłačvali rasijski haz pa canie kala 107 dalaraŭ. U vyniku «Hazprom» zajaviŭ ab nieabchodnaści raspłacicca pa daŭhach, jakija naprykancy 2016 hoda dasiahnuli 500 młn dalaraŭ, a ciapier składajuć 726 młn.
«Na hety hod pastaŭlenaja zadača skaracić piersanał na 10%. Kampanija płanuje skarektavać inviestycyi i sacprahram. Tamu siarod piersanału ciapier jość peŭnaja naściarožanaść», — skazała TUT.BY krynica, blizkaja da biełaruskaj «dački» «Hazproma».
Dadzienaja tema nibyta abmiarkoŭvałasia da sustrečy Uładzimira Pucina i Alaksandra Łukašenki 3 krasavika ŭ Sankt-Pieciarburhu. Na joj, nahadajem, baki zajavili pra dasiahnutyja damoŭlenaści pa vyrašeńni naftahazavaha kanfliktu. Minsk pavinien vypłacić «Hazprom transhaz Biełaruś» zapazyčanaść u 726 młn dalaraŭ. Adnak z 2018 hoda pa kaniec 2019 hoda Rasija pradastavić Biełarusi źnižku ŭ vyhladzie panižalnaha kaeficyjenta da formuły cany na haz. Pamier źnižki siońnia abmiarkoŭvaŭsia ŭ Maskvie.
Jak vynikaje sa spravazdač, siaredniaśpisačnaja kolkaść rabotnikaŭ «Hazprom transhaz Biełaruś» na 1 studzienia 2017 hoda składała 6526 čałaviek. «Kažuć, što pavinny zvolnić nibyta 600 čałaviek na rehijanalnym uzroŭni. Ale pakul heta ŭsio razmovy», — skazaŭ jašče adzin surazmoŭca.
Nahadajem, što ŭ śniežni 2016 h. była zakansiervavanaja budoŭla «Hazprom centr» ŭ Minsku. Heta taksama źviazvali z padzieńniem dachodaŭ biełaruskaj «dački» «Hazproma».
«Hazprom» staŭ ułaśnikam 100% «Biełtranshaza» (ciapier «Hazprom transhaz Biełaruś») u kancy 2010 hoda. «Hazprom transhaz Biełaruś» ekspłuatuje biełaruski ŭčastak mahistralnaha hazapravoda «Jamał — Jeŭropa», jaki naležyć «Hazpromu», daŭžynioj 575 km liniejnaj častki i 5 kampresarnych stancyj. Hazatranspartnaja sistema Biełarusi ŭklučaje ŭ siabie bolš za 7,9 tys. Kkm hazaprovadaŭ, 13 kampresarnych stancyj, 3 padziemnyja schoviščy hazu, 226 hazaraźmierkavalnych stancyj, 27 aŭtamabilnych hazanapaŭnialnych kampresarnych stancyj, 7 hazavymiaralnych stancyj.
