7 krasavika dniom u centry Stakholma čałaviek na skradzienym hruzaviku vyjechaŭ na piešachodnuju vulicu i źbiŭ kala 20 čałaviek, paśla čaho ŭrezaŭsia ŭ budynak ŭniviermaha. Zahinuli čatyry čałavieki, jak minimum 15 atrymali ranieńni, čaćviora znachodziacca ŭ ciažkim stanie. Ułady pryznali zdareńnie teraktam. Uviečary taho ž dnia byŭ zatrymany padazravany — 39-hadovy vychadziec z Uźbiekistana. «Mieduza» raspaviadaje, što viadoma pra jaho praz sutki paśla teraktu.
Palicyja raspaŭsiudziła zdymak čałavieka, jaki adšukvaŭsia ŭ suviazi z teraktam, praź niekalki hadzin paśla teraktu. Na fota z kamier videanazirańnia byŭ mužčyna ŭ zialonaj kurtcy i šeraj kofcie z kapiušonam. Palicyja nie stała nazyvać jaho padazravanym; mužčynu paprasili jak maha chutčej źviazacca z uładami, a hramadzianam rekamiendavali pry sustrečy ź im nie ŭstupać u kantakt i źviarnucca ŭ palicyju.
Fatahrafija, raspaŭsiudžanaja palicyjaj Stakholma paśla teraktu. Fota: TT News Agency / Reuters / Scanpix / LETA
Uviečary 7 krasavika stała viadoma pra zatrymańnie padazravanaha. Palicyja paćvierdziła, što jon padobny na čałavieka c raspaŭsiudžanaj fatahrafii. Nočču mužčyna byŭ papiarednie aryštavany pa padazreńni ŭ ździajśnieńni teraktu šlacham zabojstva; 8 krasavika palicyjanty paćvierdzili, što mienavita jon, chutčej za ŭsio, siadzieŭ za rulom hruzavika.
Zatrymany - hramadzianin Uźbiekistana. Nieŭzabavie paśla zatrymańnia pra heta paviedamiła vydańnie Aftonbladet; prakuratura paćvierdziła hetuju infarmacyju na nastupny dzień. Mužčynu 39 hadoŭ, jaho imia nie nazyvajecca. Jak daŭno jon žyvie ŭ Šviecyi, pakul nieviadoma.
Pa słovach jaho znajomaj, u mužčyny čaćviora dziaciej; jon pracavaŭ u budaŭničaj śfiery i dumaŭ pierš za ŭsio pra toje, jak adpravić pabolš hrošaj siamji. Pra palityku i relihii, śćviardžaje žančyna, jon «nikoli nie kazaŭ».
Złačyniec byŭ zatrymany ŭ pryharadzie Stakholma Mierście. Krynicy Aftonbladet ŭ palicyi raspaviadajuć, što adrazu paśla napadu złačyniec zabieh u univiermah Åhlens (u jaki da hetaha urezaŭsia) i praź jaho spuściŭsia na stancyju mietro «T-Sientralen». Tam jon pasprabavaŭ sieści na ciahnik, ale nie paśpieŭ. Tady jon znoŭ padniaŭsia na vulicu i dabieh da čyhunačnaha vakzała, dzie sieŭ na ciahnik u bok aeraporta. Adtul jon na aŭtobusie dajechaŭ da Miersty i pryjšoŭ pieššu na aŭtazapraŭku, dzie i byŭ zatrymany paśla zvanka minakoŭ u palicyju.
Chutčej za ŭsio, jon paciarpieŭ pry sutyknieńni hruzavika z mašynaj; Aftonbladet piša, što ŭ momant zatrymańnia jon byŭ lohka paranieny, jaho adzieńnie było ŭ askiepkach škła.
Pry im nibyta była maska. Adznačajecca taksama, što mužčyna ŭ momant zatrymańnia pavodziŭ siabie «dziŭna», ale što mienavita majecca na ŭvazie, nieviadoma.
Infarmacyi ab jaho matyvach niama.
Šviedskija ŚMI pisali, što ŭ zatrymanaha ŭ fejsbuku byli znojdzienyja prapahandysckija materyjały terarystyčnaj arhanizacyi «Isłamskaja dziaržava»; akramia taho, jon nibyta pastaviŭ łajk fatahrafii ź miesca vybuchu na Bostanskim marafonie ŭ 2013 hodzie.
U palicyi i śpiecsłužbach zajavili, što źviestak pra jaho suviazi z ekstremistami niama. Pra jaho mahčymyja matyvy ŭ palicyi zajavili, što ŭ złačynca, «vidavočna, byli złyja namiery».
Zatrymany byŭ viadomy specsłužbam.
Pradstaŭniki šviedskaj słužby dziaržaŭnaj biaśpieki SEPO raspaviali, što jon epizadyčna traplaŭ u pole zroku śpiecsłužbaŭ, ale nie ŭ suviazi z ekstremizmam. Padrabiaznaściaŭ ŭ SEPO nie pryviali.
U terarysta mahli być saŭdzielniki.
U palicyi padkreślili, što, choć i ličać zatrymanaha vykanaŭcam teraktu, nie vyklučajuć, što da złačynstva mohuć mieć dačynieńnie i inšyja ludzi. Palicyja taksama paćvierdziła, što ŭ kabinie hruzavika byŭ znojdzieny padazrony pradmiet - mahčyma, vybuchovaje prystasavańnie.
Šviedskija ŚMI paviedamlali ab zatrymańni ŭ suviazi z teraktam jak minimum jašče adnaho čałavieka, ale hetaja infarmacyja pakul nie paćvierdziłasia.
