Pa spravie «Biełaha lehijona» («spravie patryjotaŭ») raspačynajecca novaja kryminalnaja sprava. Artykuł 287 KK — «Stvareńnie niezakonnaha ŭzbrojenaha farmavańnia».
Fota Iryny Arachoŭskaj
U Biełarusi heta adbyvajecca ŭpieršyniu, piša hazieta «SB. Biełaruś siehodnia», jakaja źmiaščaje vialiki materyjał na hetuju temu. Adznačajecca, što «śledstva vyśviatlaje fakty pa stvareńni hłyboka zakanśpiravanaj arhanizacyi z dakładnaj ijerarchijaj, žorstkaj dyscyplinaj, abjadnanaj ideałahičnaj asnovaj, uzbrajeńniem». Padkreślivajecca, što «artykuł — vielmi i vielmi strohi». Kiraŭnictva «niezakonnym uzbrojenym farmavańniem» ci ŭdzieł u im karajecca abmiežavańniem voli na termin da 5 hadoŭ ci pazbaŭleńniem voli na termin ad 3 da 7 hadoŭ. Abvinavačańnie pa hetym artykule vystavili 20 čałaviekam.
SB piša, što pa spravie ab padrychtoŭcy «masavych biesparadkaŭ» prachodzić 35 čałaviek. 17 ź ich vystavili abvinavačańnie, jany aryštavanyja. Jašče 18 čałaviek znachodziacca ŭ statusie padazravanych. Zhadanyja 20 čałaviek ź liku hetych 35-ci.
U publikacyi «Adździeła rasśledavańniaŭ» śćviardžajecca, što zajava pra samarospusk «Biełaha lehijona» byŭ sprobaj «pierachitryć śpiecsłužby». Nibyta, ad samaha pačatku arhanizacyja stvarałasia «jak nielehalnaja struktura» i jana mahła «pračnucca» ŭ luby momant». Zhadvajecca i jaje «pastajannaja suviaź» ź Mikałajem Statkievičam. Nibyta, jon spadziavaŭsia, što lehijaniery stanuć jaho «asabistaj hvardyjaj». Taksama adznačajecca, što raniej «Lehijon» znachodziŭ spačuvańnie ŭ asobnych aficeraŭ siłavych struktur». Zhadvajecca babrujski kłub «Patryjot», pad prykryćciom jakoha, nibyta, «išła śpiecpadrychtoŭka i padtrymka bajavoj formy «lehijanieraŭ». KDB staŭ fiksavać adnaŭleńnie centralizavanych palavych zboraŭ «lehijanieraŭ» u 2014 hodzie. A ŭ sakaviku sioleta śpiecsłužbie stała viadoma pra ich kantakt z maładafrontaŭcami, śćviardžaje vydańnie.
U publikacyi taksama śćviardžajecca, što siabry «Biełaha lehijona», jakija znachodziacca za kratami, mocna trymajucca, niekatoryja ź ich maŭčać. Pryvodziacca frahmienty z pakazańniaŭ asobnych zatrymanych.
Źmieščany list nieviadomaj «hramadzianki Hiermanii ź biełaruskimi karaniami», jakaja «papiaredziła» ŭłady Biełarusi pra niejkuju pravakacyju, što rychtavałasia na 25 sakavika ŭ Minsku. I KDB adreahavaŭ na hety «sihnał», pačalisia zatrymańni, pieratrusy i h. d.
Padkreślivajecca taksama, što biełaruskija siłaviki nanieśli dva ŭdary. Pieršy — pa aŭtarach «Rehnuma», udar pa «Biełym lehijonie» byŭ druhim.
