Apošnim časam pa sacyjalnych sietkach papaŭźli čutki — nibyta milicyja «ŭziałasia» za hulcoŭ haradskoha kvestu «Schvatka». Mierkavańni hučali roznyja: ci to «schvatčyki» karystalisia hulnioj dla zakładki spajsaŭ, ci to dla inšych spravaŭ, źviazanych z narkotykami. Taksama vahajecca ličba nibyta zatrymanych: ci to ich dvoje, ci to čaćviora, ci to nieviadoma kolki.
Niekatoryja navat źviazali zatrymańnie sa spravaj «Biełaha lehijona».
Nasamreč nohi ŭ hetaj historyi rastuć z vypadku, jaki adbyŭsia pry kancy sakavika. Tady na pustcy pa vulicy Prytyckaha ŭ Minsku zatrymali dvaich.
«Chłopiec ź dziaŭčynaj raskładvali skrutki z zabaronienym rečyvam. U pary byli raźmierkavanyja roli — adzin rabiŭ zakładku, druhi fatahrafavaŭ miesca, kudy pakłali narkotyk, — paviedamili ŭ milicyi. — Małady čałaviek paśpieŭ zaŭvažyć apieratyŭnikaŭ i kinuŭsia praz pustku naŭcioki, na biahu vykidvajučy z kišeni pakunki z narkotykam. Kali jaho dahnali, jon raspavioŭ, što razam ź dziaŭčynaj zajmajecca raspracoŭkaj i padrychtoŭkaj kvestaŭ dla adnoj vielmi bujnoj kamiercyjnaj kampanii. Jany «vyjšli ŭ pole dla rekahnascyroŭki», a apieratyŭniki ŭsio nabłytali. Maŭlaŭ, toje, što jon vykidvaŭ niejkija pakunački z kišeniaŭ, im taksama padałosia. Ale try pakunački z paraškom biełaha koleru byli znojdzienyja milicyjantami ŭ kišeni chłopca pry nadhladzie».
Pryčym, jak paźniej stała viadoma «Našaj Nivie», u milicyjantaŭ na toj momant užo była apieratyŭnaja infarmacyja pra zaniatki maładzionaŭ.
Pakunački z kišeniaŭ byli identyčnyja tym, jakija małady čałaviek vykidvaŭ na biahu, zapeŭnili ŭ UUS Minabłvykankama.
«Ahułam pravaachoŭniki znajšli na pustcy kala 20 pakunačkaŭ z 30 h parašku — asabliva niebiaśpiečnym psichatropnym rečyvam alfa-PVP. Padčas pieratrusu na kvatery dziaŭčyny apieratyŭniki znajšli jaje chłopca, raniej sudzimaha za niezakonny abarot narkotykaŭ, i kala 1 h amfietaminu. Jaho, pa słovach haspadyni, jana ŭžyvała sama. Taksama doma ŭ dziaŭčyny vyjaviłasia šmat scenaryjaŭ roznych kvestaŭ, bolšaść ź jakich zvodziłasia da zakładak i nastupnaha pošuku pa kaardynatach roznych pradmietaŭ», — ahučvali milicyjanty.
U dačynieńni da zakładnikaŭ zaviedzienaja kryminalnaja sprava za niezakonny abarot narkatyčnych srodkaŭ. Ciapier im pahražaje da 15 hadoŭ pazbaŭleńnia svobody.
Paźniej vyśvietliłasia, što zatrymanyja sapraŭdy majuć dačynieńnie da kvestaŭ. Chłopiec i dziaŭčyna prapanoŭvali svaje pasłuhi pa arhanizacyi kvestaŭ, zajmalisia hetym dastatkova prafiesijna i ŭžo arhanizoŭvali hulni dla šerahu kampanij.
Zatrymanyja nasamreč viadomyja ŭ asiarodku amataraŭ i prafiesijanałaŭ, źviazanych z kvestami.
Zatrymanuju dziaŭčynu zavuć Jania Hrybava, joj 30 hadoŭ.
Jania Hrybava.
Jana skončyła BDU, vučyłasia na fakultecie žurnalistyki. Raniej pracavała pijar-mieniedžaram u handbolnym kłubie «Dynama Minsk».
Chłopiec, Mikita Uradaŭ, viadomy siarod hulcoŭ pad mianuškaj Śniehavik. Jamu 31 hod. Mikita skončyŭ Instytut pahraničnaj słužby, zajmaŭsia spartyŭnym aryjentavańniem.
Mikita Uradaŭ.
Ivan Marozaŭ, suzasnavalnik kampanii «Hiejm Rum», jakaja zajmajecca kvestami ŭ Minsku, kaža, što dla jaho samoha zatrymańnie Uradava j Hrybavaj stała šokam: «Tak, zatrymanyja majuć dačynieńnie da ruchu «Schvatki», hulali ŭ jaje, raspracoŭvali scenary. Ale ž padobnym zajmajecca šmat ludziej.
Ja ź imi taksama pierasiakaŭsia. Blizkimi znajomymi nie byli, ale ž navat zamaŭlaŭ hulni. Ludzi źviartajucca da nas, kab pravieści niejkaje karparatyŭnaje mierapryjemstva, a my ŭžo ci sami raspracoŭvajem kvest, ci šukajem na subpadrad znajomych sa «schvatkavaha ruchu», kaho viedajem jak dobrych arhanizataraŭ. Kankretna da Jany i Śnieha pretenzij nikoli nie było, svaju pracu jany vykonvali vydatna, — raspavioŭ «Našaj Nivie» Ivan. — Pra toje, što jany mohuć być źviazanyja z narkotykami, padazreńniaŭ nikoli nie było. Kali ja daviedaŭsia pra ich zatrymańnie, heta stała šokam».
Prykładna toje ž samaje kaža i Jaŭhien Šapašnikaŭ, arhanizatar užo lehiendarnaha haradskoha kvestu «Schvatka».
«Tak, Jana i Mikita byli hulcami «Schvatki». Siabroŭstvam heta nie nazavieš, ale my ź imi pracavali nad niekalkimi prajektami kvestaŭ, — paviedamiŭ «Našaj Nivie» Šapašnikaŭ. — Zatrymańnie było niečakanym. Ja nikoli nie čuŭ, što jany źviazanyja z narkotykami. Mikita ŭvohule byŭ spartoŭcam, adnym z najlepšych hulcoŭ u «Schvatku».
Taksama ani Ivan Marozaŭ, ani Jaŭhien Šapašnikaŭ nie čuli pra inšyja vypadki, źviazanyja z zatrymańniami «schvatčykaŭ». «Nichto bolš zatrymany nie byŭ. Prynamsi, u Minsku, heta ja dakładna viedaju», — zapeŭniŭ Šapašnikaŭ.
Jaŭhien Sačak, aficyjny pradstaŭnik UUS Minabłvykankama, taksama paviedamiŭ «Našaj Nivie», što ŭ apošni čas bolš nie było zatrymańniaŭ, źviazanych z haradskimi kvestami ci ŭdzielnikami padobnych hulniaŭ:
«Ja nie ŭzhadaju za apošni čas inšych zatrymańniaŭ, źviazanych z kvestami. Dy i hetaja navina — zdavałasia b zvyčajnaje zatrymańnie zvyčajnych zakładčykaŭ, usia jaje cikavaść mienavita ŭ hetym momancie z kvestami».
«Majo asabistaje mierkavańnie takoje: kali b było žadańnie ŭ orhanaŭ abmiežavać aktyŭnaść schvatčykaŭ, to čamu b nie vykarystać zakanadaŭstva ab masavych mierapryjemstvach? Bo luby kvest pa sutnaści «masavaje mierapryjemstva». I toje, što zatrymanyja majuć dačynieńnie da kvestaŭ, jašče nie padstava dla kanśpirałahičnych teoryj», — miarkuje Ivan Marozaŭ.
