U praciahu «Fantastyčnych istotaŭ» — filma pavodle scenara šatłandskaj piśmieńnicy Džoan Roŭlinh, čyjo dziejańnie adbyvajecca za 65 hadoŭ da jaje pieršaha «Hary Potera» - źjavicca piersanaž čaraŭnika Dambłdora ŭ vykanańni Džuda Łou, paviedamiŭ režysior stužki Devid Jejts.
U kinasazie pra junaha čaraŭnika baradataha prafiesara mahii syhrali Ryčard Charys i Majkł Hamban.
«Łou hraje Dambłdora takim, jakim jon byŭ zadoŭha da taho, jak uznačaliŭ škołu viadźmarstva i čaraŭnictva «Chohvarts», jakim jaho daviedalisia ŭ knihach i filmach pra Hary Potera. My sustrakajem jaho niekalkimi dziesiacihodździami raniej, kali jon jašče vykładaŭ u škole tranśfihuacyju», - havorycca ŭ zajavie stvaralnikaŭ budučaj karciny.
Pa słovach režysiora karciny, novy scenar Roŭlinh advodzić siužet va ŭsio bolš ciomnyja časy čaroŭnaha śvietu.
«Džud Łou — fienamienalna talenavity akcior, čyjoj pracaj ja daŭno zachaplaŭsia. Ź nieciarpieńniem čakaju sustrečy ź im na zdymačnaj placoŭcy. Upeŭnieny, jon bliskuča raskryje niečakanyja hrani Albusa Dambłdora, pakolki Roŭlinh pakazvaje zusim inšy pieryjad jaho žyćcia», - dadaŭ Jejts.
Pieršy film «Fantastyčnyja istotaŭ i dzie jany žyvuć» vyjšaŭ u prakat u listapadzie minułaha hoda i sabraŭ 813 miljonaŭ dalaraŭ.
Praciah, u jakim zdymiecca Džud Łou, vyjdzie praz dva hady paśla pieršaha filma. Nazva dla sikvieła jašče nie zaćvierdžana.
