Paŭnočnaja Kareja hatovaja adkazać na jadziernuju ataku z boku ZŠA anałahičnym udaram, zajaviŭ vice-maršał Karejskaj Narodnaj Armii Čchvie Ren Chie, paviedamlaje VVS.
«My hatovyja adkazać na tatalnuju vajnu — tatalnaj vajnoj, na jadziernuju vajnu — jadziernym udaram», — zajaviŭ Čchvie Ren Chie, vystupajučy na paradzie, pryśviečanym 105-j hadaviny z dnia naradžeńnia zasnavalnika KNDR Kim Ir Siena.
Jak paviedamlaje infarmahienctva Kioda, akramia lidara Paŭnočnaj Karei Kim Čen Yna na paradzie prysutničaje kiraŭnik Upraŭleńnia dziaržaŭnaj biaśpieki Kim Chon Vuń. Raniej paŭdniovakarejskija ŚMI paviedamlali, što jon represavany.
Na paradzie, siarod inšaj vajennaj techniki, demanstravalisia najnoŭšyja ŭzory balistyčnych rakiet, jakija zapuskajucca z padvodnych łodak.
Napiaredadni namieśnik kiraŭnika MZS Paŭnočnaj Karei Chan Son Rel u intervju ahienctvu Asašyejted pres uskłaŭ na ZŠA adkaznaść za eskałacyju na karejskaj paŭvyśpie i zajaviŭ, što KNDR hatovaja nanieści «previentyŭny ŭdar» pa amierykanskich siłach u rehijonie.
Jon adznačyŭ, što adkaznaść za situacyju ŭ Karei lažyć u pieršuju čarhu na prezidencie ZŠA Donaldzie Trampie, jaki svaimi «ahresiŭnymi tvitami stvaraje niepryjemnaści».
U pačatku krasavika Tramp zajaviŭ, što ŭłady ZŠA hatovyja «razabracca» z Paŭnočnaj Karejaj, navat kali Kitaj nie zachoča Vašynhtonu ŭ hetym dapamahčy.
