Šukajem dziaŭčynku abo chłopčyka na padsialeńnie ŭ dom, Kałodziščy (4 km ad Minska). My zdajom 2-i pavierch z pakojem na 17 m.kv.. U pakoi ścienka-siekcyja i raskładnaja kanapa. Akramia taho, u rasparadžeńni budzie placoŭka pierad pakojem i častka kamorki na druhim paviersie. Na pieršym paviersie — ahulnaja vialikaja kuchnia, zvyčajnyja tualet-vanna. U pakoi jość dźviery, jakija viaduć u druhi niedabudavany pakoj, ale tam tolki doški i tlen. Kali vy lubicie abraznuju došku ci sumavać — zabirajcie ŭ davažku.
Prapanova padydzie tym, chto nie zanadta patrabavalny da ŭsiakich jeŭraramontaŭ, lubić pryrodu (za płotam — biareźnik i chvojny lasny masiŭ), katacca na rovary (jość kładoŭka z asobnym uvachodam z vulicy) i nie baicca dobraha sabaki i husiej-indyčak (ptuški zaniatyja razborkami adna z adnoj i nie ŭjaŭlajuć niebiaśpieki, sabaka dyk uvohule tolki jeść i śpić).
Možacie prynieści svajho kata ci kurycu (jość nieŭładkavany pievień). Vyłučym miesca pad aharod. Na dvary jość turnik, areli, altanka (treba razhrebci ź zimy). Jość šłanh z vadoj. Možna palivać husiej (supakojvaje).
Naš Vialiki Asnoŭny Pievień (i maleńki reziervovy) nie daduć vam praspać na pracu z ranicy — pačynajučy z 4.30 jany raŭnamierna kukarekajuć ź intervałam, usio jak u vašym dziacinstvie ŭ babuli! Zrešty, kali treba paspać, to ich nie zaŭvažaješ.
Susiedzi (heta značyć, my) — fatohraf-žurnalist i dyrektar (ka) eka-majsterniaŭ, i dva dziciaci (žyviom, adpaviedna, na pieršym paviersie). Usie nie kurać i nie pjuć, čakajem taho ž ad najmalnika.
Kali vy ŭsio žyćcio maryli pamacać ciopłaha husaka abo navučycca rabić bahoŭku z kardona — heta miesca dla vas.
Transpartnaja dastupnaść — za płotam prypynak aŭtobusa da mietro Uručča (20 chv.). 700 mietraŭ da centralnaha skryžavańnia pasiołka — tam kuča maršrutak i aŭtobusaŭ da horada (uklučajučy maju lubimuju 1547, jakaja za 1 (!) rubiel viazie ad Kałodziščaŭ-Uručča praz uvieś Minsk pa praśpiekcie ažno da Karžanieŭskaha kožnyja 12 chvilin).
Jość wi-fi (byfly).
Kaštuje heta ŭsio — jak i pakoj u horadzie (100$), ale sa svaimi pluškami.
***
Tut i dalej — abnaŭleńnie tekstu na asnovie pytańniaŭ, jakija ŭźnikli.
Siabry, tut užo pytajucca, kolki kaštuje pryjechać i papalivać husiej. Mianie heta pytańnie ŭvodzić u zamiašańnie. Kali siadziš za svaim bukam i ŭ luby momant možaš nadzieć tapki, uziać šłanh i palić paračku husiej, a chtości pazbaŭleny takoj mahčymaści. I jak za heta brać hrošy?
U čym sens palivu husiej? Sutnaść prostaja:
1. Vy palivajecie husaka
2. Huś uvilhatniajecca, joj dobra
3. Vam dobra, tamu što jamu dobra
4. Naohuł usim dobra
5.???
6. PROFIT!!!
Husi lubiać vadu, a sažałki ŭ nas niama. Kali ich palivać, jany ŭzbadziorvajucca. Možna napoŭnić viadro z vadoj, jany i tam buduć kupacca.
Čamu dobra macać husaka? Zvonku jon uvieś taki vodatryvały i hładki, a pad kryłami ŭ jaho padpušak, jon tam haračy (u ptušak zaŭsiody vysokaja tempieratura) i vielmi miakki. Sama huś, jak praviła, suprać, ale jość varyjanty.
Na fota źleva — aktualnyja husi, sprava — šłanh.
Kali chto pieražyvaje, našych ptušak my nie jamo. Jany byli zaviedzieny dla dušeŭnaha spakoju ŭ niaprosty pieryjad.
I tak, my pakoj zdajem.
A padpisacca na fejsbuk NN možna tut.
