18-hadovaha žychara Homielskaha rajona pryznali vinavatym u kradziažy i zabojstvie. Termin pakarańnia, 10 hadoŭ i adzin miesiac małady čałaviek budzie adbyvać u papraŭčaj kałonii ahulnaha režymu, paviedamili ŭ pres-słužbie abłasnoha suda.
Prysud u zakonnuju siłu nie ŭstupiŭ i moža być abskardžany.
Nahadajem, što trahiedyja adbyłasia 17 kastryčnika 2016 hoda kala 22.00 u vioscy Šarpiłaŭka Homielskaha rajona.
Abvinavačany Uładzisłaŭ Jurčanka (na momant ździajśnieńnia złačynstva jamu było jašče 17 hadoŭ) prakraŭsia ŭ dvor doma, dzie žyła 43-hadovaja nastaŭnica. Vyčakaŭšy momant, kali žančyna vyjšła z chaty, chłopiec nanios joj amal 30 udaraŭ nažom.
Nastaŭnica pamierła na miescy zdareńnia, cieła zahinułaj znajšli tolki na nastupnuju ranicu.
18 hadoŭ Uładzisłavu spoŭniłasia zusim niadaŭna — 8 sakavika. Chłopiec skončyŭ homielskaje PTV, žyŭ u vioscy, nidzie nie pracavaŭ, zredku dapamahaŭ maci na fiermie.
Z zabitaj i jaje 48-hadovym sužycielem chłopiec paznajomiŭsia ŭ 2013 hodzie. Małady čałaviek pieryjadyčna dapamahaŭ im pa haspadarcy. U 2016-m Uładzisłaŭ skraŭ u ich bałharku i zabraŭ skutar — paśla hetaha ich znosiny spyniłasia. Chłopca pryciahnuli da adkaznaści za kradziež, ale ŭ suviazi z prymireńniem bakoŭ kryminalnaja sprava była spynienaja. Skutar Uładzisłaŭ viarnuŭ i pavinien byŭ pakryć 60 rubloŭ materyjalnaj škody.
Napiaredadni zabojstva, 16 kastryčnika, abvinavačany i zahinułaja sustrelisia na vulicy. Pa słovach chłopca, žančyna spytała ŭ jaho, kali jon źbirajecca viartać hrošy, i pasprabavała dać jamu aplavuchu.