Kibierzłačyncaŭ pryniata ŭsprymać jak niešta dalokaje. Adnak ich niamała i ŭ Biełarusi, pryčym časam im udajecca zajmieć niemałyja sumy. Praŭda, viadoma pra ich stanovicca tolki paśla zatrymańnia pravaachoŭnymi orhanami. 42.tut.by sabraŭ samyja prykmietnyja historyi vykryćcia biełaruskich chakieraŭ i kardaraŭ.
Fota: Reuters / Thomas Peter.
Bank, jaki nie zaŭvažyŭ
Mahčyma, samaja «bujnaja» afiera kibierzłačyncaŭ ź Biełarusi — vykradańnie 8 miljonaŭ jeŭra z rachunkaŭ zamiežnych hramadzian. Złamyśniki vykradali asabistyja źviestki trymalnikaŭ płastykavych kartak z dapamohaj padstaŭnych anłajn-kram i fiktyŭnaj kampanii pa raspracoŭcy prahramnaha zabieśpiačeńnia. Achviarami mižnarodnaj hrupoŭki stali bolš za 130 tysiač trymalnikaŭ płaciežnych kartak z 29 krain.
Čatyroch udzielnikaŭ hrupy, u tym liku lidara, zatrymali ŭ Biełarusi ŭ sakaviku hetaha hoda. Adnaho ź fihurantaŭ ŭžo asudzili na siem hadoŭ pazbaŭleńnia voli.
Paśla śledčyja vyśvietlili, što ŭsie vosiem miljonaŭ jeŭra prachodzili praź biełaruski bank. Złamyśniki ździejśnili bolš za sto tysiač pieravodaŭ, prykładna tracinu ŭładalniki kartak sprabavali abskardžvać. Paśla hrošy vyvieli ŭ inšyja krainy i abnajavili.
Supracoŭnikaŭ banka zapadozryli ŭ słužbovaj chałatnaści, suprać ich raspačali kryminalnuju spravu. Praŭda, aficyjnyja pradstaŭniki banka zapeŭnivajuć, što «nie majuć infarmacyi ab tym, što apieracyjnaja dziejnaść ažyćciaŭlałasia z parušeńniem patrabavańniaŭ zakanadaŭstva».
Sprava na miljon
U krasaviku minułaha hoda traich biełarusaŭ zatrymali ŭ Minsku pa padazreńni ŭ kradziažy 1,35 miljona dalaraŭ u firmy z ZŠA.
Pavodle źviestak śledčych, hrošy z rachunkaŭ vykradalisia z vykarystańniem škodnasnych kamputarnych prahram, z dapamohaj jakich złačyncy atrymlivali dostup da bankaŭskich rekvizitaŭ kampanij. Paśla złačyncy sprabavali lehalizavać skradzienaje praź fiktyŭnyja kampanii, zarehistravanyja ŭ Biełarusi, Kitai, Banhładeš i inšych krainach.
Mužčynam vystavili abvinavačvańnie ŭ ździajśnieńni złačynstvaŭ, praduhledžanych č. 4 art. 212 (Kradziež šlacham vykarystańnia kamputarnaj techniki, ździejśnieny arhanizavanaj hrupaj u asabliva bujnym pamiery) Kryminalnaha kodeksa. Sankcyi pa hetym artykule praduhledžvajuć da 15 hadoŭ pazbaŭleńnia voli z kanfiskacyjaj majomaści.
Fota: Reuters.
12-hadovy kibierzłačyniec
Chočacie dapamahčy achviaram teraktu hrašyma? Sajt z takoj prapanovaj stvaryŭ padletak ź Biełarusi paśla trahiedyi 11 vieraśnia 2001 hoda. «Chakier» prymaŭ dabračynnuju dapamohu dla padtrymki achviar trahiedyi, ale hrošy pakidaŭ sabie.
Na toj momant ašukancu było ŭsiaho 12 hadoŭ. Małady čałaviek byŭ niepaŭnaletnim, i zatrymlivać jaho nie stali. Pa dadzienych pravaachoŭnych orhanaŭ, chłopčyk byŭ uziaty na kantrol, ź im praviali pracu. U pole zroku pravaachoŭnych orhanaŭ jon bolš nie traplaŭ.
525 vykradzienych kartak
Nie tak daŭno stała viadoma pra Siarhieja Patapava, jakoha zatrymali ŭ ZŠA. Jamu 26 hadoŭ, jon hramadzianin Biełarusi, jaki pražyvaje ŭ Łos-Andžełasie. Patapava i čatyroch rasiejcaŭ abvinavacili ŭ kradziažy asabistych źviestak i machlarstvie z płastykavymi kartkami.
Pavodle suda, piaciora abvinavačanych zhavarylisia ź niejkimi chakierami. Tyja arhanizavali ataki na kampjutarnyja sistemy avijakampanii i dvuch miedycynskich ustanoŭ. Va ŭsich troch vypadkach złačyncy atrymlivali źviestki kredytnych abo debietavych kartak, jakija dazvalali im rabić pakupki ŭ internecie.
Škodu ad dziejnaści hrupy acanili ŭ 5 miljonaŭ dalaraŭ, adna z kampanij u vyniku ataki začynilisia.
Hrupu aryštavali ŭ minułym hodzie. U Patapava vyjavili kala 525 płastykavych kartak, vypuščanych na imiony inšych ludziej. U sakaviku i krasaviku ŭsie piaciora pryznali svaju vinu. Sudovyja słuchańni zapłanavanyja na červień i vierasień hetaha hoda, biełarusu pahražaje da 12 hadoŭ pazbaŭleńnia voli.
Džekpot ad bankamata
Chakiery znajšli sposab uzłomvać bankamaty: jany prosta padychodziać da terminałaŭ i za ličanyja chviliny atrymlivajuć hrošy, nie karystajučysia kartkaj. Hety sposab uzłomu nazvali «džekpocinham» — ad słova džekpot — dziakujučy atacy na ŭnutranyja sietki banka złačyncy atrymlivali ŭsio źmieściva bankamata.
Takim čynam hrupoŭka chakieraŭ skrała kala 3 miljonaŭ jeŭra ŭ roznych krainach śvietu. U studzieni hetaha hoda adnaho z udzielnikaŭ hetaha sindykata zatrymali na terytoryi Biełarusi. Napeŭna nie viadoma, ci byŭ jon hramadzianinam našaj krainy.
Pa sumie škody i farmatu złačynstvaŭ dziejnaść hetaha sindykata nahadvaje apisańnie mižnarodnaj hrupoŭki Cobalt, asnoŭnaja aktyŭnaść jakoj razharnułasia na Tajvani. Pavodle infarmacyi Reuters, dziejnaść hetaj hrupy zakranuła bankamaty bolš za 10 krain, siarod jakich była i Biełaruś.
Darečy, u žniŭni 2016 hoda biełaruski Alfa-Bank adklučyŭ usie svaje bankamaty «z-za chakierskaj ataki na prahramnaje zabieśpiačeńnie bankaŭskaha abstalavańnia i sproby kradziažu najaŭnych hrošaj». Bank nie paviedamiŭ, chto mienavita sprabavaŭ uzłamać bankamaty, adnak hrošy klijentaŭ zastalisia ŭ poŭnaj zachavanaści.
Vykradalniki asob
U 2007 hodzie dvoje biełarusaŭ — Dźmitryj Naskaviec i Siarhiej Siamaška — stvaryli «kryminalny startap» CallService.biz, jaki absłuhoŭvaŭ inšych internet-machlaroŭ. Jany dapamahali abyjści sistemu biaśpieki bankaŭ tym, chto vykarystaŭ skradzienyja bankaŭskija dadzienyja i numary kredytak.
Dźmitryj Naskaviec. Fota: asabisty archiŭ / dev.by
Kali bank chacieŭ paćvierdzić padazronyja tranzakcyi pa telefonie, biełarusy vydavali siabie za sapraŭdnych klijentaŭ. Jany «vykradali asoby» - znachodzili infarmacyju pra achviaru, u tym liku imia, paštovy adras, numar sacyjalnaha strachavańnia i adkazy na sakretnyja pytańni nakštałt «Jak zavuć vašaha starejšaha brata?».
Siervis ździejśniŭ bolš jak 5400 paśpiachovych paćvierdžańniaŭ tranzakcyj i absłužyŭ bolš za dźvie tysiačy machlaroŭ, bolšaść achviar byli amierykancami. «Ruski chakier - čałaviek niaskvapny, heta ž nie jaki-niebudź kibierhopnik, a intelihient z duchoŭnymi skrepami. Z Rasii možna rabavać Amieryku amal u adkrytuju, praciahvajučy tradycyi chałodnaj vajny i padkormlivajučy FSB», - raspaviadaŭ Naskaviec u intervju vydańniu Dev.by.
Dźmitryja Naskaŭca zatrymali ŭ Čechii i ekstradavali ŭ ZŠA. Jamu pahražała da 38 hadoŭ źniavoleńnia, ale ŭ vyniku jon pravioŭ 33 miesiaca ŭ turmie na Manchetanie. Paśla jon dałučyŭsia da amierykanskaj firmy «biełych chakieraŭ», jakaja kansultuje kampanii pa pytańniach kibierbiaśpieki. Siarhieja Siamašku asudzili ŭ Biełarusi na 11,5 hoda, jon adbyvaje pakarańnie da hetaha času.
Samy sumlenny ŭzłomščyk
U 2010 hodzie niechta pačaŭ uzłomvać sajty biełaruskich dziaržorhanaŭ i pryvatnych kampanij. Nieviadomy atrymlivaŭ dostup da resursaŭ bankaŭ i vydańniaŭ, a paśla źviazvaŭsia z administratarami sajta i tłumačyŭ, jak jamu ŭdałosia heta zrabić.
«Naprykład, vyjaviŭšy resurs adnaho z bankaŭ, jon pisaŭ, što źjaŭlajecca jaho klijentam i jamu nie chočacca, kab znojdzienaj dzirkaj skarystaŭsia niechta jašče», — raskazvała pra jaho vydańnie «SB. Biełaruś Siehodnia» sa słoŭ śledčaha, jaki vioŭ spravu.
Robinhudam vyjaviŭsia biełaruski prahramist Raman, jaki ŭ toj čas žyŭ u inšaj krainie. Jon nie chavaŭ svaje kaardynaty i nie vykarystoŭvaŭ śpiecyjalnych srodkaŭ dla maskiroŭki IP. Dostup da sajtaŭ jon atrymlivaŭ z domu.
Chakier śćviardžaŭ, što ździajśniaŭ uzłomy, kab pravieryć biaśpieku resursaŭ. Na sami sajty jon dadavaŭ elemienty koda i tekst. Kali Raman viarnuŭsia ŭ Biełaruś, jamu vystavili abvinavačvańni pa čatyroch artykułach Kryminalnaha kodeksa.
«Jak ja skraŭ miljon»
Adzin z samych viadomych biełaruskich kardaraŭ - Siarhiej Paŭłovič, viadomy jak Policedog. Dziakujučy machinacyjam sa źviestkami płastykavych kartak jon skraŭ kala 1,2 miljona dalaraŭ, ź jakich atrymaŭ kala 800 tysiač. Adnak niekalki ździełak jon pravioŭ sa śpiecahientam, z-za čaho trapiŭ u pole zroku pravaachoŭnych orhanaŭ.
Siarhiej Paŭłovič padčas sudovych słuchańniaŭ u 2009 hodzie. Fota: «BiełHazieta».
Paŭłovič trojčy pryciahvaŭsia da suda i pravioŭ u biełaruskaj turmie 10 hadoŭ. U ZŠA jaho pryznali datyčnym da «samaha bujnoha kradziaža piersanalnaj infarmacyi za ŭsiu historyju krainy» i vykradańnia 40 miljonaŭ dalaraŭ. U hetaj krainie jamu pahražaje pažyćciovaje źniavoleńnie.
Jon napisaŭ knihu «Jak ja skraŭ miljon. Spoviedź kardara, jaki raskajaŭsia». Ciapier Paŭłovič vyjšaŭ na volu, žyvie ŭ Rasii i zajmajecca biznesam.
«Pakul ciabie nie złavili, ty karol — ty atrymaŭ 10, 100 tysiač dalaraŭ. Adnak vočy raspluščvajucca, jak tolki traplaješ za kraty. I kali padzialić kolkaść vykradzienych hrošaj na kolkaść miesiacaŭ źniavoleńnia, razumieješ, što za hety čas ty moh by lohka zarabić bolš hrošaj absalutna lehalna», - raspaviadaŭ jon u intervju 42.tut.by.
