Nastaŭnicy 218-j minskaj škoły pryjšli ŭ dom da byłoha namieśnika staršyni Ruchu «Za Svabodu» palitołaha Alesia Łahvinca i jaho žonki Vieraniki Mazurkievič, kab pravieryć, ci nie znachodzicca ich adnahadovaje dzicia ŭ «sacyjalna niebiaśpiečnym stanoviščy». Svoj vizit dvoje piedahohaŭ patłumačyli pastanovaj, jakaja pryjšła im z suda, paviedamlaje radyjo.net.
fota Źmitra Rusaka
Nastaŭnicy pierapisali meblu ŭ kvatery hramadskaha dziejača i pravieryli, ci jość na voknach firanki. Z razmovy piedahohaŭ Vieranika Mazurkievič zrazumieła, što siarod siemjaŭ, jakija im zahadali pravieryć, znachodziacca niekalki siemjaŭ, dzie baćki byli pakaranyja za ŭdzieł u niadaŭnich palityčnych pratestach.
«Jany zajšli ŭ kvateru i pačali začytvać mnie pastanovu suda. Paśla hetaha jany paprasili mianie «rastłumačyć pavodziny muža». Jany paprasili mianie paŭpłyvać na muža, tamu što, «kali praciahnucca takija vypadki», to našu siamju mohuć pastavić na ŭlik jak niebiaśpiečnuju dla maleńkaha dziciaci, — raspaviadaje Vieranika Mazurkievič. — U lubym vypadku, ich prychod byŭ nakiravany na toje, kab zapałochać, jakim-niebudź čynam paŭpłyvać na baćkoŭ, dla jakich, biezumoŭna, samaje darahoje — heta dzieci.
23 sakavika Alesia Łahvinca zatrymali i źbili amapaŭcy ŭ cyvilnym. Čatyry dni jon pravioŭ pad vartaj u špitali, paśla čaho sudździa suda Maskoŭskaha rajona Minska Viktar Kazak pakaraŭ jaho 10 sutkami aryštu. Na sudzie amapaŭcy zajavili, što palitołah «łajaŭsia matam», a pierałom nosa i čerapna-mazhavuju traŭmu Aleś Łahviniec atrymaŭ, bo «sam biŭsia hałavoj ab kresła ŭ słužbovaj mašynie».
Čytajcie taksama: «Treba było raśpisacca, a ŭ ZAHSach kažuć: «Vy što? Heta tak chutka nie robicca!» — siamiejnaja hutarka z Łahvincami
