Pradstaŭnikam kampanii «Pravaabaroncy suprać śmiarotnaha pakarańnia ŭ Biełarusi» stała viadoma ab pryviadzieńni ŭ vykanańnie śmiarotnaha prysudu ŭ dačynieńni da žychara Homiela Siarhieja Vostrykava. Jahonaja maci atrymała adpaviednaje paviedamleńnie z Homielskaha abłasnoha suda.
Kaardynatar kampanii Andrej Pałuda miarkuje, što rasstralać Vostrykava mahli z 13 pa 29 krasavika, pakolki apošni list ź SIZA №1, dzie ŭtrymlivaŭsia asudžany da vyšejšaj miery, byŭ datavany mienavita 13 krasavika, a abłasny sud atrymaŭ paviedamleńnie ab pryviadzieńni ŭ vykanańnie śmiarotnaha prysudu 29-ha. Aproč hetaha 5 krasavika maci dazvolili sustrecca z synam u SIZA. Heta była ich apošniaja sustreča.
33-hadovy Siarhiej Vostrykaŭ u mai 2016 hoda byŭ prysudžany da pakarańnia śmierciu za zhvałtavańnie i zabojstva dźviuch žančyn. Alesia Pancialejeva i Alaŭcina Mašurykava źnikli ŭ 2014-m i 2015 hadach. U mai 2015 hoda milicyja zatrymała mužčynu, jakoha stali padazravać u dačynieńni da prapažy, a paźniej - i ŭ zabojstvie dziaŭčat. Zabojcam akazaŭsia 33-hadovy ŭpakoŭščyk pradpryjemstva, na jakim pracavali ŭsie troje. Pa śviedčańniach, mužčyna viedaŭ i Alaŭcinu, i Alesiu, ale nie siabravaŭ ź nivodnaj ź ich — prosta byli znajomyja pa pracy. Dla taho, kab schavać złačynstvy, jon zabiŭ dziaŭčat, a cieły zabitych advioz na svajoj mašynie ŭ les u Homielskim rajonie.
***
Zaraz pravaabaroncy sprabujuć udakładnić infarmacyju pra los jašče adnaho asudžanaha da śmiarotnaha pakarańnia — žychara Mazyra Kiryły Kazačka. Jon admoviŭsia ad abskardžańnia prysudu ŭ Viarchoŭnym sudzie, napisaŭšy adpaviednuju zajavu, u suviazi z čym sprava była źniataja z apielacyjnaha razhladu. Isnujučaja praktyka śviedčyć ab tym, što vielmi redka śmiarotnikaŭ, u jakich nie zastałosia mahčymaściaŭ abskardzić prysud ci atrymać pamiłavańnie ad prezidenta, rasstrelvajuć pa adnym.
U kamiery śmiarotnikaŭ takim čynam moža zastavacca tolki žychar Naroŭli Alaksiej Michalenia, u jakoha zastałasia mahčymaść abskardzić svoj prysud u Viarchoŭnym sudzie.
