Savieckaha sajuza daŭno niama i carkva žyvie svabodna, ale ŭ Hrodnie adbyłasia «mistyčnaja» situacyja ŭ duchu samych ciomnych hadoŭ «vajaŭničaha ateizmu». Z fatahrafii na sajcie abłasnoj haziety «Hrodzienskaja praŭda» źnikła ikona Chrysta, pry hetym na inšych fota ŭ hetym ža materyjale ikonu vidać. Chtości dobra papracavaŭ u fotašopie, voś tolki dla čaho?
Fota zroblena 6 traŭnia padčas pasadki alei «Sirień Pobiedy» niedaloka ad Kałožskaj carkvy. U akcyi ŭdzielničali staršynia harvykankama Miečysłaŭ Hoj, vieterany, školniki i pradstaŭniki carkvy.
Usio prachodziła pobač z parafijalnym centram, dzie nad uvachodam pastajanna visić ikona Chrysta. Udzielniki fatahrafavalisia na fonie budynka, i ŭ materyjałach Hrodna.life i «Hrodzienskaj praŭdy» ikonu dobra vidać. Akramia adnoj, zahałoŭnaj fatahrafii «HP». Na joj ikona źnikła, i heta vyklikała abureńnie ŭ viernikaŭ, pradstaŭnikoŭ carkvy i savieta vieteranaŭ.
Adfotašopleny zdymak pieradrukavali rajonnyja haziety.
«My, udzielniki ŭračystaha mitynhu ŭ Kałožskim parku, byli vielmi aburanyja, ździŭleny i zakłapočanyja tym, što na fota, apublikavanym na sajcie haziety «Hrodzienskaja Praŭda» ad 06.05.2017 hoda, adsutničaje ikona Chrysta. Padobnyja skažeńni rečaisnaści padryvajuć aŭtarytet ŚMI», — napisaŭ u hazietu staršynia vieteranskaj arhanizacyi pry ŽES-5 Pisaraŭ V.A.
List vieteranaŭ
«Adyšli ŭ niabyt hady, kali heta praktykavałasia. Sučasnaja pravasłaŭnaja carkva aktyŭna ŭdzielničaje ŭ hramadskim žyćci krainy, kłapocicca ab patryjatyčnym vychavańni moładzi, pryvivajučy ludziam luboŭ i pavahu adzin da adnaho, niasie słovy Praŭdy.
Chaciełasia b viedać, ad kaho zychodziła inicyjatyva zamalavać na fota ikonu i ŭ imia čaho?» — pytajecca vieteran.
U materyjale Hrodna.life ikona vyrazna bačnaja
Nastajaciel Kałožskaj carkvy Alaksandr Bałońnikaŭ taksama ździŭleny: čamu takoje adbyłosia, bo jon, jak i ŭsie, udzielničaŭ u pasadcy alei i ničoha pieraduziataha nie naziraŭ.
«Kali mnie pra heta skazali ludzi, jakija čytajuć «Hrodzienskuju praŭdu», ja byŭ ździŭleny. Chočacca vieryć, što heta nieparazumieńnie. I kali heta sapraŭdy tak, to my spadziajomsia, što redakcyja «HP» vypravić hetuju techničnuju niedakładnaść».
Navinu z fotazdymkami pieradrukavali niekalki rajonnych haziet i sajt Hrodzienskaha harvykankama. Tak pa sietcy raspaŭsiudziłasia «Hrodzienskaja niapraŭda».
Zdymak, na jakim źnikła ikona, na sajcie harvykankama.
Paśla šmatlikich skarhaŭ u redakcyju haziety hałoŭnuju fatahrafiju pamianiali. Ciapier na joj prysutničaje ikona. Ale na sajtach, što zrabili pieradruki, fatahrafija zastajecca staroj.
